थापाथली ‘सुकुम्वासी’को प्रतिकारमा घाइते महानगर प्रहरी प्रमुखसहित १९ घाइतेकाे उपचार हुँदै

१२ मंसिर, काठमाडौं । थापाथलीस्थित वाग्मती नदी किनारमा रहेको सुकुम्बासी बसोबास गरिरहेको भनिएको बस्तीका बासिन्दासँग भएको झडपमा महानगर प्रहरीका प्रमुख राजु पाण्डे घाइते भएका छन् ।

बस्ती हटाउन डोजर लिएर जाने क्रममा बस्तीबाट घरेलु हतियार खुकुरी, भाला, हँसिया बोकेर निस्किएका बासिन्दाले प्रतिकार गर्दा प्रमुख पाण्ढेसहित १५ जना घाइते भएका छन् ।

अधिकार सम्पन्न वाग्मती सभ्यता एकीकृत विकास समिति र महानगरको टोली सोमबार दिउँसो बस्तीमा एक्स्काभेटर लिएर घर टहरा भत्काउन अगाडि बढ्दा हतियारसहित प्रदर्शन गर्दै प्रतिकारमा उत्रिएका थिए ।

बस्ती हटाउन नपाउने भन्दै बस्तीबाट महिला, पुरुष, युवायुवतीहरु सडकमा टायर बालेर प्रतिकार गरेका थिए । उनीहरूले महानगर प्रमुख बालेन शाहविरूद्ध नाराबाजी गरेका थिए । प्रदर्शनकारको ढुंगा प्रहारबाट पाण्डेको टाउकोमा गम्भीर चोट लागेको छ ।

अन्य घाइतेहरुमा महानगरका प्रहरी रहेका छन् । घाइतेहरूको अहिले नर्भिक अस्पतालमा उपचार भइरहेको काठमाडौं महानगर प्रमुख बालेन्द्र शाहका स्वकीय सचिव भूपदेव शाहले बताए ।नर्भिक अस्पतालका सुरक्षा अधिकृत रामकृष्ण बलामीका अनुसार १९ जना घाइतेलाई अहिले उपचारका लागि ल्याइएको छ ।