उदयपुर १ मा मतगणना विवाद: १०० मतपत्र बदर गरेर पुन: गणना

१३ मंसिर, काठमाडौं । उदयपुर क्षेत्र नं. १ को स्थगित मतगणना पुन: प्रारम्भ भएको छ । दश वटा मतदान केन्द्रका प्रदेशसभातर्फ १०० मतपत्र बदर गरेर मतगणना सुरु गर्न दलहरुबीच सहमति भएको छ । सहमतिपछि मत गणना पुनः सुचारु भएको छ ।

प्रदेशसभा (ख) तर्फका १०० वटा मतपत्र दोहोरो परेकाले ती मतपत्रहरु बदर गर्ने निर्णय भएको मुख्य निर्वाचन अधिकृत कृष्णप्रसाद सुवेदीले जानकारी दिए ।

मंसिर १० गते मतगणनाको क्रममा खोलिएका जनता मावि, श्रीपुर (क), जनता मावि, देउरी (क), जनता मावि, देउरी (ख), जनता मावि, देउरी (ग), अम्वेवर मावि, राजावास (क), बालमन्दिर मावि, बोक्से (ख), मावि चिलाउने (ख)समेत गरेर १० वटा मतदान केन्द्रहरुको मतपेटिका खोली मिसाइएका मतपत्रहरु बदर हुने जनाइएको छ ।

कुनै प्रणाली वा सभाको मतपत्र दोहोरो परेमा त्यस्तो मतपत्र बदर गर्ने व्यवस्थाबमोजिम बदर गरिएको जनाइएको छ । मतगणनाको क्रममा प्रतिनिधिसभा प्रत्यक्षतर्फको मतपेटिकामा प्रदेशसभा २ अन्तर्गतका प्रत्यक्षतर्फका १०० वटा मतपत्र भेटिएपछि मतगणना रोकिएको थियो ।

यस क्षेत्रमा सत्ता गठबन्धनका उम्मेदवार परराष्ट्रमन्त्री समेत रहेका नेपाली कांग्रेसका डा. नारायण खड्का र नेकपा (एमाले)की मञ्जु कुमारी चौधरीबीच प्रतिस्पर्धा चलिरहेको छ । अहिले डा.खडकाले अग्रता लिइरहेका छन् ।