सुनसरी–४ मा सीसीटीभी फुटेजमा सहमति, मतगणना सुरु हुँदै

१३ मंसिर सुनसरी । सुनसरी क्षेत्र नम्बर ४ मा रोकिएको मतगणना सुरु हुने भएको छ । सर्वपक्षीय बैठकले चार दिनयता रोकिएको सुनसरी–४ को मतगणना आज दिउँसो १ बजेदेखि सुरु गर्ने सहमति भएपछि मतगणना सुरु हुने भएको हो ।

मतगणना पुनः थाल्न निर्वाचन आयोगले निर्देशन दिएपछि मंगलबार बिहान सर्वपक्षीय बैठक बसेको थियो । बैठकमा विवादित क्षेत्रको मतगणनाको सीसीटीभी फुटेज हेर्ने सहमति भएको छ । सहमति आनुसार सबै कुरा सीसीटीभीमा देखिए अनुसार हुने र गर्ने भनिएको छ । गनिएका सबै मतपत्र फुटेजमा देखाइनेछ ।

सहमतिअनुसार अहिले दलका प्रतिनिधि, उमेदवार, मुख्य निर्वाचन अधिकृत, जिल्ला न्यायाधिवक्ता, प्रशासन र सुरक्षा प्रमुखले यसअघिको फुटेज हेरेका छन् । त्यसपछि दिउँसो १ बजेदेखि मतगणना पुनः सुरु गर्ने निर्णय गरिएको हो ।

सञ्चार तथा सूचना प्रविधिमन्त्री समेत रहेका सत्ता गठबन्धनका साझा उमेदवार ज्ञानेन्द्रबहादुर कार्कीले मतगणनाका क्रममा धाँधली भएको भन्दै निवेदन दिएपछि शनिबार अपराह्नदेखि गणना रोकिएको छ । यहाँ कार्की नेकपा (एमाले)का उमेदवार जगदीशप्रसाद कुसियैतसँग झिनो मतान्तरले अगाडि छन् ।