प्रतिनिधिसभा प्रत्यक्षतर्फ निर्वाचित ८ महिलामध्ये ३ जना नयाँ दलबाट

१३ मंसिर, काठमाडौं । मंसिर ४ मा सम्पन्न प्रतिनिधिसभाको प्रत्यक्षतयर्m निर्वाचित ८ महिला सांसदमध्ये ३ जना नयाँ दलका छन् ।प्रत्यक्षतर्फका १६५ मध्ये १५९ सिटको अन्तिम मत परिणाम आइसकेको छ ।

सुनसरी क्षेत्र नं. ३ र ४ तथा उदयपुरको क्षेत्र नं. १ मा मत गणना भइरहेको छ । सुनसरी ३ मा एमालेकी भगवती चौधरीले नेपाली कांग्रेसका विजय गच्छदार र उदयपुर १ मा कांग्रेसका नारायण खडकासँग एमालेकै मञ्जुकमारी चौधरी प्रतिस्पर्धा गरिरहेकी छन् ।

दोलखा, बाजुरा र स्याङजाको २ नम्बर क्षेत्रमा मत गणना नै शुरु भएको छैन । स्याङजामा कांग्रेसका धनराज गुरुङसँग एमालेकी पद्मा अर्याल प्रतिस्पर्धामा छिन् । दोलखा र बाजुरामा मुख्य दल कांग्रेस, एमाले र माओवादी केन्द्रबाट महिला उम्मेदवार छैनन् ।

अन्तिम मतपरिणाम आइसकेका क्षेत्रहरुबाट जम्मा ८ महिला उम्मेदवारले मात्र चुनाव जितेका छन् । दलहरुले उम्मेदवार बनाउँदा बखत नै महिला संख्या न्यून तोकेका थिए । संविधानत ३३ प्रतिशत कोटा महिलालाई छुट्याउनुपर्ने व्यवस्था छ । हालसम्म प्रतिनिधिसभा प्रत्यक्षतर्फ ८ क्षेत्रमा अर्थात ८ जना मात्र महिला उम्मेदवार निर्वाचित भएका छन् ।

पुराना मुख्य दलहरु कांग्रेसले ५३ सिट जित्दा एकै जना तेह्रथुमबाट सीता गुरुङ, माओवादी केन्द्रले १७ जित हासिल गर्दा दाङ २ बाट रेखाकुमारी शर्मा, एमालेले ४३ सिट जित्दा सुनसरी ३ बाट भगवती चौधरी, धनुषा ३ बाट जुलीकुमारी महतो र कास्की २ बाट विद्या भट्टराई विजयी भएका छन् ।

बाँकी विजयी ३ जना दुई वटा नयाँ दलका छन् । यसै वर्ष गठित राष्ट्रिय स्वतन्त्र पार्टीको तर्फबाट काठमाडौं २ बाट सोबिता गौतम र ललितपुर ३ बाट डा. तोसिमा कार्की रहेका छन् भने कैलाली १ बाट नागरिक उम्मुक्ति पार्टीकी रञ्जिता चौधरी श्रेष्ठ छन् ।