खेलअघि इरानलाई चिढ्याउँदै अमेरिका

१३ मंसिर, काठमाडौं । अमेरिका इरानलाई चिढ्याउन उद्यत रहेको पाइएको छ । आज राति १२ः४५ बजे फिफा विश्वकपको समूह बी मा रहेका अमेरिका र इरानबीच प्रतिस्पर्धा हुँदैछ । खेलअघि इरान र अमेरिकाबीच लामो समयदेखि जारी शीतयुद्धको असर प्रकट भएको छ ।

यस्तो अवस्थामा अमेरिकी फुटबल महासंघले इरानलाई चिढ्याउँदै आफ्नो सामाजिक सन्जालमा गरेको ग्राफिक पोष्टमा इरानको झण्डामा इस्लामिक गणराज्यको प्रतीक चिह्न हटाइदिएको छ । अमेरिका इरानमा भइरहेको विरोधमा प्रदर्शनकारीको साथमा रहेको र मानवअधिकारका लागि लडिरहेका महिलाको समर्थनका लागि सामाजिक सञ्जालमा आधिकारिक झण्डा प्रयोग नगर्ने निर्णयसहित यो कदम उठाएको उसको भनाई छ ।

इरान सरकारले आफ्नो राष्ट्रिय झण्डामा भगवानको नाम हटाएको आरोपसहित आक्रोश व्यक्त गरिसकेको छ ।
अमेरिकी पुरुष फुटबल टिमको आधिकारिक ट्वीटर ह्याण्डलमा पोष्ट गरिएको समूह चरणका टिमहरुको ग्राफिक ब्यानरमा समेत इरानको राष्ट्रिय झण्डामा हरियो, सेतो र रातो रंगको प्रयोग गरिएको छ । प्रतिक चिन्ह रहेको ठाउँमा अंग्रेजीमा इरान अक्षर लेखिएको छ ।