एकीकृत समाजवादी राष्ट्रिय दल बन्न कसरत गर्दै

१३ मंसिर, काठमाडौं । मंसिर ४ मा सम्पन्न प्रतिनिधिसभा र प्रदेशसभा निर्वाचनको समानुपातिक तर्फको मत गणना जारी रहेको छ । मत परिणामअनुसार प्रत्यक्षतर्फ नेपाली कांग्रेस र समानुपातिकतर्फ नेकपा (एमाले)ले अग्रता लिइरहेको छ । नेकपा (माओवादी केन्द्र)ले दुवैतर्फ तेस्राे स्थान ओगिटरहेकाे छ ।

मंगलबार दिउँसो ४ बजेसम्म प्रतिनिधि सभाको समानुपातिकतर्फ कुल ९८ लाख ८ हजार ९२७ मत गणना हुँदा एमालेको अग्रता कायमै छ । एमालेले २६ लाख ४३ हजार १९१ मत प्राप्त गरी पहिलो स्थानमा रहँदा दोस्रो स्थानमा रहेको नेपाली कांग्रेसले २४ लाख ९९ हजार १४५ मत प्राप्त गरेको छ भने नेकपा (माओवादी केन्द्र)ले ११ लाख २७ हजार ७६८ मतका साथ तेस्रो स्थानमा छ ।

राष्ट्रिय स्वतन्त्र पार्टीले १० लाख ८५ हजार १७२ मत प्राप्त गर्दा राष्ट्रिय प्रजातन्त्र पार्टी ५ लाख ५९ हजार २७७ मतसहित चौथोमा रहेको छ । तर माधवकुमार नेपाल नेतृत्वको नेकपा (एकीकृत समाजवादी)ले भने २ लाख ७७ हजार ३ मत ल्याएको छ । मतगणना जारी छ । प्राप्त कूल मतको ३ प्रतिशत ल्याउन सके मात्र एकीकृत समाजवादी राष्ट्रिय दलमा दर्ज हुन्छ ।

एमालेबाट फुटेर बनेकाे याे पार्टी अहिले राष्ट्रिय दल बन्न संघर्ष गरिरहेको छ । राष्ट्रिय दल बन्न थप ५० हजार मत आवश्यक पर्छ । चुनावमा यो पार्टीले कलम चिन्ह लिएर प्रतिस्पर्धा गरेको छ । एकीकृत समाजवादीले भन्दा सिके राउतको जनमत पार्टी र उपेन्द्र यादवको जसपाले धेर मत ल्याएको छ । जनमत राष्ट्रिय दल बन्ने पक्कापक्की भएको छ ।