स्याङ्जा २ मा धनराज गुरुङले थप अग्रता बढाए

१५ मंसिर, स्याङ्जा । स्याङ्जा क्षेत्र नं. २ मा सत्ता गठबन्धनकाे साझा उम्मेदवार नेपाली कांग्रेसका उपसभापति धनराज गुरुङले अग्रता थप बढाएका छन् ।

पछिल्लाे मतगणनाअनुसार गुरुङले ६ हजार ६ सय ९८ मत पाएका छन् भने नेकपा (एमाले)की उम्मेदवार पदमा अर्यालले ५ हजार ३ मत पाएकी छन् । गुरुङ र अर्यालबीचको मतान्तर १ हजार ६ सय ९५ रहेकाे छ । राष्ट्रिय स्वतन्त्र पार्टी (रास्वपा)का टिकराज गुरुङले २ हजार ४ मत पाएका छन् ।

एमालेले धाँधली भएको भन्दै पुन मतदान माग गरेपछि यहाँ १२ दिन मतगणना रोकिएको थियो । निर्वाचन आयोगले बुधबार स्याङजा बाजुरामा पुन: मतदान गर्नुकाे साटाे मतगणना सुरू गर्ने निर्णय गरेपछि बुधबार रातिदेखि नै मतगणना सुचारू भएको हो ।

बाजुरामा भने मतगणना सुरू हुन सकेकाे छैन । एमालेले मतगणनामा सहभागिता नजनाएपछि सुरू हुन नसकेकाे हाे ।