बाजुरामा मतगणना सुरू हुँदै

१५ मंसिर, काठमाडौं । बाजुरामा प्रतिनिधिसभा तथा प्रदेशसभाको मतगणना साढे ३ बजेदेखि हुने भएको छ । बुधबार दिउँसो बसेको सर्वदलीय बैठकले यस्तो निर्णय गरेको हो ।

यही मंसिर ४ मा सम्पन्न निर्वाचनमा सत्ता गठबन्धनका उम्मेदवार र नेकपा (एमाले)का उम्मेदवारबीच मतदानका क्रममा बुढीनन्दा नगरपालिका–५ स्थित एक मतदान केन्द्रमा मांग्रेस र एमालेका कार्यकर्ताबीच झडप हुँदा स्थगित भएकोमा मंसिर १० मा पुनः मतदान भएको थियो । झडपमा एक जनाकाे ज्यान समेत गएकाे थियाे । पुनः मतदानपछि पनि दुई मुख्य दलबीच बुथ कब्जाको आरोप–प्रत्यारोप चलेपछि मतगणना हुन सकेको थिए ।

त्यसपछि निर्वाचन आयोगले सहसचिवको नेतृत्वमा जाँचबुझ टोली पठाएर स्थलगत जाँचबुझबाट तयार पारिएको प्रतिवेदनमाथि छलफलपछि बुधबार मात्र आयोगले पुन: मतदानको साटो मतगणना गर्ने निर्णय लिएपछि मतगणनाको प्रक्रिया शुरु भएको हो ।

मुख्य निर्वाचन अधिकृतकाे कार्यालयले बुधबार साँझ बाेलाएकाे बैठकमा एमाले सहभागी नभएपछि बैठक स्थगित भएकाे थियाे । कार्यालयकाे अनुराेधमा पुन: बिहीबार बिहान ११ बजे बाेलाएकाे सर्वदलीय बैठकपछि दिउँसाे ३:३० बजेबाट मतगणना सुरू गर्ने निर्णय भएकाे कार्याललयले जनाएकाे छ ।

बाजुरामा सत्ता गठबन्धनको साझा उम्मेदवार नेपाली कांग्रेसका बद्रि पाण्डे र एमालेबाट कर्णबहादुर थापाबीच कडा प्रतिस्पर्धा हुने अनुमान गरिएको छ ।

यही प्रकृति विवादका कारण स्याङजा २ मा पनि मतगणना रोकिएको आयोगको बुधबारको निर्देशनपछि बुधबार रातिबाटै यहाँ मतगणना जारी छ । यहाँ नेपाली कांग्रेसका धनराज गुरुङले एमालेकी पदमा अर्यालभन्दा १७०० मतसहित अगाडि छन् । यहाँको प्रदेश ‘क’मा नेपाली कांग्रेसकै उम्मेदवार भोजराज आर्यल एमालेका मोहन रेग्मीभन्दा १३०० मतले अगाडि छन् । मतगणना जारी छ ।

दाेलखामा मतगणना हुन सकेकाे छैन । यहाँ निर्वाचन आयोगकै निर्देशनअनुसार जिल्लाका मतदान केन्द्रमध्ये आज १० वटा मतदान केन्द्रमा मतदान भइरहेकाे छ । मतदान सम्पन्नपछि मात्र सर्वदलीय बैठक राखेर मतगणना गरिने छ ।