सुदुरपश्चिम यू–१९ राष्ट्रिय क्रिकेटको फाइनल प्रवेश

१६ मंसिर, काठमाडौं । सुदुरपश्चिम प्रदेश यू–१९ राष्ट्रिय क्रिकेट प्रतियोगिताको फाइनल प्रवेश गरेको छ ।

प्रतियोगिताभर अपराजित रहेको सूदुरपश्चिम बागमती प्रदेशमाथि ७ विकेटको जीत निकाल्दै फाइनल प्रवेश गरेको हो ।
शुक्रबारको खेलमा बागमतीले दिएको १२५ रनको मध्यम लक्ष्य पछ्याएको सुदूरपश्चिमले १९.३ ओभरमा ३ विकेट गुमाउँदै लक्ष्य भेट्टायो ।

सुदूरपश्चिमका लागि कप्तान अनुराग शाहीले सर्वाधिक ३९ रनको अविजित खेले । उनले ४४ बल खेल्दै ६ चौका प्रहार गरेका थिए ।

ओपनरद्वय दीपक बोहोरा र मिलन बोहोराले क्रमशः १७ र १० रन बनाए । गजेन्द्र बोहोराले ९ बलमा १९ रनको अविजित खेले ।

बागमतीका लागि रोशन विकले सर्वाधिक २ विकेट लिएका थिए ।यसअघि मुलपानी क्रिकेट मैदानमा टस जितेर ब्याटिङ रोजेको बागमती प्रदेश २८.४ ओभरमा १२४ बनाउँदै अलआउट भएको थियो ।