अत्तरिया बजारका अवैध संरचनामा नगरपालिकाे नजर, डाेजर लगाएर भत्काइँदै

१९ मंसिर, धनगढी । कैलालीको अत्तरियामा आइतबारदेखि बजार क्षेत्रमा सडक अतिक्रमण गरेर निर्माण गरेका संरचना हटाउन सुरु गरेको नगरपालिकाले सोमबार पनि निरन्तरता दिने भएको छ ।

गोदावरी नगरपालिकाअन्तर्गत पर्ने यस क्षेत्रमा सडक अतिक्रमण गरी निर्माण गरिएका संरचना भत्काउने अभियानलाई आज पनि निरन्तरता दिने भएको हो ।

नगरपालिकाको कार्यालय अगाडिबाट सुरु गरिएको भत्काउने अभियान बजार क्षेत्रमा पुगेको छ। गोदावरीका नगरप्रमुख वीरेन्द्र भट्टले अत्तरिया बजारलाई व्यवस्थित बनाउन अतिक्रमित संरचना हटाउन सुरू गरेका हुन् । कतिपय अतिक्रमणकारीले आइतबारदेखि नै आफैंले संरचना हटाउन सुरु गरेका छन् ।

भत्काउनुपहिले आफैंले हटाएर पालिकालाई सहयोग गर्न उनले अनुरोध गरेका छन् । डाेजरले भत्काउँदा सामानमा क्षति पुग्ने हुनाले आफूले बारम्बार अनुरोध गर्दै आइरहेको उनले बताए ।

गत वैशाख ३० मा स्थानीय तहको निर्वाचनमा स्थानीय तहको नेतृत्वमा नयाँ अनुहारको प्रवेशपछि देशका विभिन्न स्थानीय तहले आफ्नो क्षेत्रभित्रका सार्वजनिक प्रयोगका क्षेत्रमा अतिक्रमण गरी बनाइएको भौतिक संरचना ३५ दिने सूचना प्रकाशित गर्दै हटाउने अभियान नै चलाइरहेका छन् ।

यसमा पहिलोपटक काठमाडौं महानगरपालिकाका मेयर बालेन शाहले महानगरभित्र सडक, पार्किङ, फुटपाथ तथा धार्मिक–पुरातत्विक क्षेत्रहरुमा अतिक्रमण गरी बनाइएका टहरा, पार्किङ स्थल तथा फुटपाथ अतिक्रमणलाई हटाउन सुरु गरेका हुन् । त्यसपछि महानगरका छिमेकी नगरपालिकादेखि देशैभर अभियानको रुपमा अघि बढाइएको छ ।