दुर्घटनाका घाइतेको मृत्यु भएपछि सडकमा शव राखेर प्रदर्शन

१८ मंसिर, बारा । गत मंसिर १५ गते दुर्घटनामा परेर घाइते भएका बारा जितपुरसिमरा उपमहानगरपालिका–५ का ३५ वर्षीय विजयी माझीको गत मंसिर १५ गते उपचारका क्रममा मृत्यु भएको छ । मृत्युपछि आक्रोशित पीडितका आफन्तले सोमबार जितपुरसिमराको सडक अवरोध गर्दै प्रदर्शन गरेका छन् ।

पथलैया निजगढ सडक खण्डमा दाउरा लिएर साइकलमा आउने क्रममा नम्बर नखुलेको सवारी साधनले माझीलाई ठक्कर दिँदा उनी गम्भीर घाइते भएका थिए ।

घाइते माझीलाई उपचारका लागि अस्पताल ल्याइएको थियो । उपचारकै क्रममा उनको मृत्यु भएपछि रकम अभाव भएका कारण उनको शव अस्पतालमै रहेको थियो । स्थानीयले चन्दा संकलन गरी १ लाख ८० हजार अस्पताललाई भुक्तानी गरेर मंसिर १८ गते जिल्ला अस्पताल कलैयामा पोस्टमाटम गरि आज उनीहरुले शब सडकमा ल्याएर प्रदर्शन गरेका हुन् ।

पूर्व जनप्रतिनिधि वडा नम्बर ५ का वडा अध्यक्ष मोहित चौधरीका अनुसार मृतक माझीका ४ छोराछोरी छन् । दुर्घटना भएको ४ दिन सम्मपनी प्रहरीले सो फरार गाडी पक्राउ नगरेपछि बाध्य भएर शव सडकमै ल्याएर आन्दोलन हुनु परेको बताए ।

आक्रोशित भीडले सडकमा अवरोध गर्दा करिब १ हजार सवारी साधन दुईतर्फ सडकमा अलपत्र छन् । दोषीलाई पक्राउ गरी कारबाही र पीडितलाई क्षतिपूर्ति नदिएसम्म उनीहरुले प्रदर्शन जारी राखेका छन् ।

आन्दोलनमा उत्रिएकाहरुले जितपुर चोक सडकखण्ड अवरुद्ध बनाएका छन् । सडक सवारीसाधनसमेत चल्न नदिकन आन्दोलन हुन थालेपछि ठूलो संख्यामा प्रहरी परिचालन गरिएको छ ।