महाकालीमा भारतीय अतिक्रमणप्रति सरकारको ध्यानाकर्षण

१९ मंसिर, काठमाडौं । अनेरास्ववियुले भारतले महाकाली नदीको वहाव नै नेपालतर्फ धकेल्ने गरी सीमा क्षेत्रमा बनाएको पक्की संरचनाको विरोध गर्दै नेपाल सरकारको ध्यानाकर्षण गराएको छ । दार्चुला जिल्ला सदरमुकाम खलंगा बजारमा रहेको महाकाली नदीको पुलमुनि भारतले एकतर्फी संरचना बनाएपछि स्थानीयले समेत विरोध गरेका थिए ।

स्थानीयको विरोध प्रर्दशनमा भारतीय नगरिकहरूले ढुंगा मुढा गर्दा विद्यालयमा अध्ययनरत चार जना विद्यार्थी समेत घाइते भएका थिए । तैपनि सरकार मौन बसेको भन्दै आपत्ति जनाएको छ । भारतको एकतर्फी मिचाहा प्रवृत्तिप्रति सरकार मौन बसेको भन्दै अनेरास्ववियुले भत्सर्ना गरेको छ ।

भारतले दुई देशबीचको सीमा नदी महाकालीमा अन्तर्राष्ट्रिय कानूनविपरीत संरचना बनाउने, विष्फोट गराउने कार्य निरन्तर बढाइरहेको छ । सीमा नदीमा संचालित तुइन काट्ने र सडक निर्माणमा लापरवाहीपूर्ण तरिकाले गरिएको विष्फोटका घटनामा परी छोटो समयमै २ नेपालीको ज्यान गइसकेको छ ।