महाकाली विवादबारे भारतलाई कूटनीतिक नोट पठाउने परराष्ट्रकाे तयारी

२० मंसिर, काठमाडौं । दार्चुलामा महाकाली नदीको धार नेपालतर्फ धकेलिने गरी भारतीय पक्षले तटबन्ध बनाइरहेको विषयमा परराष्ट्र मन्त्रालयले भारतलाई कूटनीतिक नोट पठाउने तयारी गरेको छ ।

दार्चुलाको सदरमुकाम खलंगापारि भारतले तटबन्ध बनाउँदा नदी नेपालतर्फ धकेलिएर नेपाललाई असर पर्ने भन्दै स्थानीयले प्रतिकार गरेका छन् । तैपनि सरकार मौन बसेपछि सरकारको आलोचना बढ्दै गइरहेको बेला सरकारले भारतलाई कुटनीतिक नोटमार्फत विरोध जनाउने तयारी गरेको हो ।

भारतीय पक्षको ज्यादातिको नेपाली पक्षबाट भएको प्रतिवाद हुँदा आइतबार महाकाली वारिपारि नेपाली र भारतीयबीच ढुंगा हानाहान भएको थियो । त्यसक्रममा नेपालीहरु घाइते भएका थिए ।

संभावित खतरा कायमै रहेको पाइएपछि उक्त घटनाबारे गृहमन्त्रालयले रिपोर्ट परराष्ट्र मन्त्रालयलाई पठाइसकेको छ । सरकारको तर्फबाट भारतलाई कूटनीतिक नोट पठाउने तयारी भइरहेको परराष्ट्र स्रोतले बतायो ।

घटनापछि सोमबार भएको स्थाीय स्तरमा नेपाल–भारतका प्रशासन अधिकारीहरुबीच भएको वार्तामा तत्काल विवादित क्षेत्रमा तटबन्ध नबनाउने सहमति भएको छ। सोही विषय दार्चुला सिडिओले गृह मन्त्रालयमा जानकारी दिएका थिए । भारतीय पक्षले आफ्नोतिर तटबन्ध लगाउँदा नेपालतर्फ असर पुग्ने गरी बनाएपछि पछिल्लो विवाद देखिएको उपाध्यायले बताए ।

२०७० मा आएको ठूलो बाढीका कारण नेपालीतिरकाे बजारमा ठूलो क्षति भएको थियो । भारतीले अहिले आफ्नोतिर तटबन्ध बनाउन तटबन्धभन्दा १० मिटरयता नेपालतिर ग्याविन जाली लगाएर गाडी गुड्ने अस्थायी संरचना बनाएको छ।