घरेलु हतियार प्रदर्शनले थापाथलीवासी आतंकित, सुकुम्वासी बस्ती हटाउन बालेन शाहलाई ज्ञापनपत्र

२० मंसिर, काठमाडौं । काठमाडौंको थापाथलीस्थित सुकमवासी बस्ती हटाउन माग गर्दै स्थानीयले काठमाडौं महानगरपालिकाका मेयर बालेन्द्र शाहलाई ज्ञापनपत्र बुझाएका छन् । स्वतस्फुर्त भेला भएका सर्वसाधारणले सोमबार ज्ञापनपत्र बुझाएका हुन् ।

सुकुम्वासीकाे नाममा अस्तव्यस्त् बसोबास र दिउँसै खुल्लारुपमा घरेलु हतियारका कारण राजधनीवासी भयावह र असुरक्षित महशुस गरेको उल्लेख गरेका छन् । खुकुरी, भाला जस्ता हतियारकाे खुला प्रदर्शनले स्थानीय आतंकित बनेकाे उनीहरूकाे भनाइ छ । हतियार सडकमा हतियार देखाउनेमाथि कारवाही हुनुपर्ने उनीहरूकाे माग छ ।

उनीहरूले थापाथलीस्थित बागमती खोलाको किनारामा रहेको सार्वजनिक/सरकारी जग्गा अतिक्रमण गरी आफूखुशी, अस्वभाविक एवं अनियन्त्रित रुपमा बसिरहेका बताउँदै तत्काल हटाउन माग गरेका छन् । सुकुम्वासीका नाममा बसाेबास गरिरहेका मानिसका कारणा खोला प्रदुर्षित भएको र राजधानीको सौन्दर्यमा समेत प्रतिकूल असर परेको जनाएका छन् ।

उक्त बस्तीमा रहेका वास्तविक सुकुमवासीको पहिचान गरी व्यवस्थापन गर्नु पर्ने र सुकुमवासीको नाममा सरकारी जग्गा अतिक्रमण गर्नेलाई कारबाही गर्नुपर्ने उनीहरूको माग छ ।

उनीहरूले सुकुम्वासी हटाउन माग गर्दै मंगलबार आज माइतीघर मण्डलामा प्रदर्शन गरेका छन् । सरकारी भूमि कब्जा गरेर बसेकाहरूलाइ तत्काल हटाउनु पर्ने उनीहरूकाे माग छ ।