कपिलवस्तुका एक न्यायाधीशमाथि जबर्जस्ती करणीकाे आराेप

२० मंसिर, काठमाडौं । कपिलवस्तु जिल्ला अदालतका एकजना न्यायाधीशमाथि एक महिलालाई वर्षौंसम्म बन्धक बनाएर जबर्जस्ती करणी (बलात्कार) गरेको आरोप लागेको छ । ती न्यायाधीशविरुद्ध परेको उजुरी सम्बन्धमा राष्ट्रिय मानव अधिकार आयोगले छानबिन सुरु गरेको छ । पीडित महिलाले साता दिन पहिले आयोगमा उजुरी दिएकी थिइन् ।

पीडित महिलाले न्यायाधीशले आफूलाई जुन अदालतमा सरुवा भयो त्यहीँ लैजाने र बन्धक बनाएर यौन शोषण गर्ने गरेको जनाउँदै उजुरी हालेकी हुन् । आरोपबारे अनुसन्धान अघि बढाउन जिल्ला प्रहरी कार्यालय कपिलवस्तु र न्याय परिषद्‌लाई पत्र लेखिएको आयोगले जनाएको छ ।

न्यायाधीशकै दबाबका कारण पीडितले घटनाबारे प्रहरीमा उजुरी दिन नसकेको र आयोगको शरणमा आइपुगेको आयोगले जनायो । पीडितले आफूमाथि ५ वर्षदेखि यौन शोषण भइरहेकाे र  पटकपटक गर्भपतन समेत गराएको आरोप लगाएकी छन् ।

अभियुक्त न्यायाधीशकै कारण प्रहरीमा जाहेरी दिन असफल भएकाे दाबी समेत पीडित महिलाले गरेकी छन् । यता न्यायाधीश गिरीले पनि ती महिलाविरूद्ध चोरीको मुद्दामा कपिलवस्तु प्रहरीमा जाहेरी दिएकाे बताइएकाे छ ।