विष्णु पौडेलको क्षेत्रमा पुनः मतदानको माग गर्दै सर्वोच्चमा रिट

२० मंसिर, बुटवल । रुपन्देही क्षेत्र नं. २ को प्रतिनिधिसभा सदस्य निर्वाचनमा पुनः मतदानको माग गर्दै सर्वोच्च अदालतमा रिट निवेदन दायर भएको छ । रुपन्देही २ को निर्वाचन अधिकृतको कार्यालयले नेकपा (एमाले)का उपाध्यक्ष समेत रहेका उम्मेदवार विष्णुप्रसाद पौडेललाई विजयी घोषणा गरिसकेको छ ।

तर अनियमित तरिकाले निर्वाचित घोषणा गरेको आरोप लगाउँदै उक्त परिणाम बदर गरी पुनः मतदान तथा मतगणनाको लागि अन्तरिम आदेश माग गर्दै राष्ट्रिय स्वतन्त्र पार्टीबाट उम्मेदवार बनेका गणेश पौडेलले मंगलबार रिट निवेदन दायर गरेका हुन् । निर्वाचनको अन्तिम मत परिणाम सार्वजनिक भएको ११ दिनपछि पौडेल सर्वोच्च गएका हुन् ।

रिट निवेदक पौडेल विष्णु पौडेलसँग १ हजार ३ सय ६६ मतान्तरले पराजित भएका थिए । उनले रुपन्देही क्षेत्र नं २ को निर्वाचन अधिकृतको कार्यालय, आयोगको केन्द्रीय कार्यालय र निर्वाचित पौडेलसहित ८ निकायलाई विपक्षी बनाएका छन् ।