चोलेन्द्रलाई सर्वोच्च प्रवेश राेक्न धर्ना दिने बारको तयारी

२१ मंसिर, काठमाडौं । संघीय संसद सचिवालयबाट आफूमाथिको महाअभियोग प्रस्ताव निष्प्रभावी भएको लिखित जवाफ पाएको भन्दै नियमित कार्यसम्पादनमा फर्किने तयारी गरिरहेका प्रधानन्यायाधीश चोलेन्द्र शमशेर जबरालाई सर्वोच्चमा प्रवेश गर्न नदिने तयारी नेपाल बारले थालेको छ ।

पत्र पाएकै दिन आजै सर्वोच्चमा काममा फर्किने बताएका चोलेन्द्रलाई रोक्न बारले आकस्मिक बैठक राखेको छ । आफूहरु विरोध प्रदर्शनको तयारीमा जुटेकोले जबरालाई कूनै हालतमा सर्वोच्च छिर्न नदिने सर्वोच्च बारका सदस्य रामहरि त्रिपाठीले बताए ।

यता नेपाल बार एसोसियसनले आकस्मिक बैठक बोलाएको छ । बारको आकस्मिक बैठक बसिरहेको जानकारी बारका अध्यक्ष गोपालकृष्ण घिमिरेले दिए । सोही कारण सर्वोच्चमा अहिले सुरक्षा व्यवस्था कडा पारिएको छ ।

सर्वोच्च बार र नेपाल बारले चोलेन्द्रविरुद्ध महाभियोग प्रस्ताव दर्ता हुनु पहिल्यैदेखि सर्वोच्च भवन निर्माण ठेक्कामा संलग्न भएको, न्यायालयभित्र बिचौलियालाई स्थान दिएको, भ्रष्टाचार मौलाउने गतविधि गरेका जस्ता आरोप लगाउँदै राजीनामाको मागसहित धर्ना आन्दोलन गरेका थिए ।