सर्वोच्चको मुख्य प्रवेश द्वारमा कानुन व्यवसायीहरुको धर्ना

२१ मंसिर, काठमाडौं । नेपाल बार एशोसिएसनको नेतृत्वमा कानून व्यवसायीहरुले सर्वोच्च अदालतको मुख्य प्रवेश द्वारमा धर्ना सुरु गरेका छन् ।

संसदीय संसद सचिवालयबाट महाभियोग निष्क्रिय भएको पत्र पाएसँगै प्रधानन्यायाधीश चोलेन्द्रशमशेर जबरा सर्वोच्च अदालत फर्किने तयारी गरेसँगै प्रवेश गर्न नदिन बार पदाधिकारीहरुले धर्ना सुरु गरेका हुन् । दुवै बारको केहीबेर अघि बसेको आकस्मिक बैठकले धर्ना दिने निर्णय गरेको हो ।

अहिले बार अध्यक्ष गोपालकृष्ण घिमिरे, महासचिव अञ्जिता खनाल, सर्वोच्च बारका अध्यक्ष पूर्णमान शाक्य, बार पूर्वअध्यक्ष चण्डेश्वर श्रेष्ठ, वरिष्ट अधिवक्ता रमण श्रेष्ठलगायत कानून व्यवसायीहरु धर्ना बसिरहेका छन् । सर्वोच्च अदालत परिसर र आसपास क्षेत्रमा सुरक्षा व्यवस्था कडा बनाइएको छ ।

यता संविधानविद्हरूले भने संसदमा दर्ता भएको महाअभियोग संसद सचिवालयले मात्र निष्प्रभावी बनाउन नसक्ने तर्क गरेका छन्।