चोलेन्द्र काममा फर्किने चर्चाले सर्वोच्चमा तनाव, दर्जर्नाैं संख्यामा सुरक्षाकर्मी परिचालन [तस्बिरहरू]

२१ मंसिर, काठमाडौं । निलम्बित प्रधानन्यायाधीश चोलेन्द्र शमशेर जबराविरुद्धको महाभियोगको प्रस्ताव निष्प्रभावी भएको संघीय संसद सचिवालयले जबरासहितलाई पत्र दिएपछि त्यसको विरोधमा अहिले सर्वोच्च अदालतको मूल गेटमा कानुन व्यवसायीहरु आन्दोलनमा उत्रिएका छन् । उनीहरु अहिले नेपाल बार एसोसिएसनकै नेतृत्वमा अहिले मुख्य गेटमा धर्नामा बसिरहेका छन ।

कानुन व्यवसायीको प्रदर्शनपछि गत १ फागुनमा दर्ता भएको जबराविरुद्धको महाअभियोग प्रस्ताव निष्प्रभावी भएको संघीय संसद सचिवालयले बुधबार जबरासहित राष्ट्रपतिको कार्यालय, प्रधानमन्त्री तथा मन्त्रिपरिषदको कार्यालय, संवैधानिक परिषद्को कार्यालय, सर्वोच्च अदालत र न्याय परिषद्लाई पत्र पठाएको छ ।

उक्त पत्र पाएपछि बुधबार नै जबरा हाजिर हुन सर्वोच्च अदाललत जाने तयारीमा छन् । उनलाई रोक्न सर्वोच्च गेटमै रोक्न केही कानुन व्यवसायी धर्नामा बसेका हुन् । प्रशासनकाे नियमित सेवा समेत प्रभावित बनेकाे छ ।

एकाएक बुधबार दिउँसोबाट सर्वोच्च अदालत परिसरमा भिडभाड बढेको छ । १० महिनापछि जबरा सर्वोच्च आउन लागेका र उनलाई रोक्न कानुन व्यवसायी धर्नामा बसेका छन् । बाक्लो संख्यामा सुरक्षाकर्मी परिचालन गरिएको छ ।

सरकारले भने महाभियोग जीवितै रहेको र आउने संसदले छलफल गरेर टुंगो लगाउने बताएको छ । आजै एक कार्यक्रममा सरकारका प्रवक्ता संचारमन्त्री ज्ञानेत्द्रबहादुर कार्कीले जबरामाथिको महाभियोग जीवितै रहेको स्पष्ट पारेका छन् ।