राष्ट्र बैंकको विरोधमा माइतीघर मण्डलामा अटोमोवाइल्स व्यवसायीहरुको प्रदर्शन

२२ मंसिर, काठमाडौं । अटो मोवाइल्स व्यवसायीहरुले राष्ट्र बैंकको विरोधमा माइतीघर मण्डलामा विरोध कार्यक्रम गरेका छन् । उनीहरू सडकमा धर्ना बसेका छन् ।

पूर्वघोषित कार्यक्रम अनुसार बिहीबार बिहान ११ बजे अटो मोवाइल्स व्यवसायीहरुको संगठन नाडा अटोमोवाइल्स एसोसिएसनको नेतृत्वमा व्यवसायीहरुले विरोध प्रदर्शन गरिरहेका छन् । अटो व्यवसायसँग सम्बन्धित विभिन्न संगठनहरुले प्लेकार्ड र ब्यानर बोकेर सहभागी भएका छन् ।

सरकार र राष्ट्र बैंकको गलत नीतिका कारण आफूहरुको व्यवसायी धरापमा परेको र बैंकको ऋण तिर्न नसकेर विस्थापित हुन विवश भएको प्रदर्शनमा सहभागीहरुले बताएका छन् ।

सरकारले गाडी आयातमा प्रतिबन्ध र राष्ट्र बैंकले बैंकिङ ब्याजदरमा कडाई गरेको भन्दै उनीहरुले व्यवसायमा सघाउ पुग्ने किसिमका नीति बनाउन सरकारसँग अाग्रह गरेका छन् ।

देशभरका अधिकांश अटो मोवाइल्स सेन्टरहरु बन्द भएको र व्यवसायीलाई अर्बौंको क्षति पुगेको उनीहरुको भनाइ छ । विरोध कार्यक्रममा दर्जनौं व्यवसायीहरु सहभागी छन् । ११ बजे सुरू भएकाे विरोध कार्यक्रम अहिले पनि जारी छ ।

नाडाले गत साता पत्रकार सम्मेलन गरेर विरोधका कार्यक्रम घोषणा गरेको थियो ।