संसद सचिवालयका महासचिव गौतमले सर्वोच्चमा पठाए इजलासमै उत्तर दिने जवाफ

२५ मंसिर, काठमाडौं । संघीय संसदका महासचिव भरतराज गौतमले सर्वोच्च अदालतको फूल कोर्टलाई जवाफ पठाएका छन् । उनले चोलेन्द्र शमशेर जबराको महाभियोग निष्प्रभावी गराएको बारे सर्वोच्च प्रशासनले सोधेको प्रश्नको जवाफी पत्र पठाएका हुन् । गौतमले सामान्य पत्र मात्र पठाएर सोधिएका प्रश्नको जवाफ भने दिएका छैनन् ।

उनले पूर्ण इजलासले यो विषयमा कारण देखाऊ आदेश जारी गरेकाले उक्त जवाफसँगै प्रशासनको पत्रको जवाफ पनि इजलासमै दिने जानकारी गराएका छन् । उनले पत्रमा भनेका छन, ’सोही विषयमा संवैधानिक इजलासले कारण देखाऊ आदेश जारी गरेकाले पूर्ण इजलासको प्रश्नको सम्मान गरेको छु । यसको जवाफ कारण देखाऊ आदेशको जवाफसँगै दिने तयारीमा छु ।’

आइतबार गौतमले सर्वोच्च प्रशासनलाई पत्र पठाएपछि यस्तो प्रतिक्रिया दिएका हुन् । गौतमले गत बुधबार सर्वोच्च अदालतका रजिस्ट्रार नारायणप्रसाद रेग्मीले सोधेका प्रश्नको आइतबार पत्र पठाउँदै यस्तो बताएका हुन् । महासचिव गौतमले निलम्बित प्रधानन्यायाधीश चोलेन्द्र शमशेर जबरामाथिको महाभियोग निष्प्रभावी भएको भन्दै सर्वोच्चलाई पत्र पठाएपछि संवैधानिक इजलासले उनीमाथि कारण देखाऊ आदेश जारी गरेको थियो ।