पेट्रोलपम्पबाट रकम असुल गरेको आरोप लागेका साह सचिवमा बढुवा

२५ मंसिर, काठमाडौं । सरकारले विवादित सहसचिव रामआधार साहलाई सचिवमा बढुवा गरेको छ । आइतबार प्रधानमन्त्री निवास बालुवाटारमा बसेको मन्त्रिपरिषद्को आकस्मिक बैठकले पेट्रोल पम्पमा ठगी गरेको आरोप लागेका साहलाई सचिवमा बढुवा गर्ने निर्णय गरेको हो ।

लोकसेवा आयोगको गत मंगलबार बसेको बढुवा सिफारिस समितिको बैठकले प्राविधिक सहसचिवत्रय साह, विश्वबाबु पुडासैनी र अर्जुनजङ्ग थापाको नाम सिफारिस गरेको थियो । तर पनि सरकारको रोजाईमा उनी परेका छन् । शहरी विकास मन्त्रालयका सचिव डा. रमेश प्रसाद सिंह मंसिर पहिलो साता अनिवार्य भएसँगै रिक्त एक प्राविधिक सचिव पदका लागि तीन जना सहसचिवको नाम सिफारिस गरिएको थियो ।

पेट्रोल पम्प काण्डमा साहलाई २०७२ मा तत्कालीन महानगरीय अपराध महाशाखाले पक्राउ समेत गरेको थियो । गुणस्तर तथा नापतौल विभागको महानिर्देशक रहँदा साहले चिप्स जोडेर पेट्रोल पम्पहरुले ठगी गर्दै आए पनि पम्प सञ्चालकसँग मिलेर मासिक रुपमा रकम उठाएको आरोप थियो ।

तत्कालिन एसएसपी सर्वेन्द्र खनालले उनलाई पक्राउ गरी कारवाहीका लागि पठाएका थिए । त्यतिबेला पम्पमा चिप्स जोडेर रिमोटमार्फत उपभोक्तालाई कम तेल दिने पम्प संचालक र गिरोहलाई पक्राउ गरेको थियो । पम्प संचालक र प्रविधि जोड्न सघाउने गिरोहको बयानको आधारमा साह गुणस्तर तथा नापतौल विभागमा हुँदा यो प्रविधि ल्याउन सहयोग पुयाएको पाइएपछि पक्राउ परेका थिए ।

२०७० सालमा भारतमा विशेष प्रहरी अपरेशनबाट लखेटिएका गिरोहको सहयोगमा प्रविधि जोडेर नेपालका पम्प संचालकले ठगी गर्न थालेका थिए । यो गिरोहका नाइके आयोब आलमले यो प्रविधि नेपालमा ल्याएका थिए ।

त्कालिन विभाग प्रमुख साहले नसिम रावल सिद्धिकी भन्ने फर्म आयलको सर्भिस सेन्टरलाई उपत्यकाभरीको पम्प मर्मतको जिम्मा दिइएको थियो । उनी २०५० सालदेखिनै काठमाडौंका पम्प मर्मत गर्थे । उनले अर्थिकमार्फत कम परिमाणको तेल बिक्री गर्न सिकाएका थिए । सिद्धिकीको काठमाडौंका केही पम्पमा समेत लगानी रहेको स्रोतले बतायो । सिद्धिकीले मर्मतको जिम्मा पाएपनि पछिल्लो दुई वर्षदेखि आलमले रिमोटमार्फत तेल घटी बिक्री गर्ने चिप्स बिक्री गर्न थालेका थिए ।

सिद्धिकी र आलम मिलेर चिप्समा आधारित ठगीलाई फैलाउने काम गरेका थिए । काठमाडौं उपत्यकामा भाडामा लिएका पम्प संचालकले यो प्रविधि आलमसँग तीस हजारमा किनेका थिए । अहिले चिप्स जडान भएका धेरैजसो पम्प मासिक चार लाखसम्म भाडा लिएर संचालन भएका हुन् । विभागका तत्कालिन महानिर्देशक साहले यो प्रविधिमार्फत ठगी गरेको थाहा पाएपछि कारवाहीको साटो पम्प संचालकसँग मासिक रुपमा रकम उठाउने गरेका थिए । विभागमा रहँदा साहले चिप्स जोडेका पम्पमा बिक्री भएको तेलको परिमाणका आधारमा कमिसन लिने गरेका थिए । तर अहिले उनी सचिवमा बढुवा भएका छन् ।