नयाँ पार्टी खोल्दै स्वतन्त्र सांसद प्रभु साह

२७ मंसिर, काठमाडौं । रौतहट ३ बाट स्वतन्त्र उम्मेदवारी दिएर प्रतिनिधिसभा सदस्यमा विजयी प्रभु साहले नयाँ पार्टी खोल्ने भएका छन् ।

निर्वाचनको मनोनयन दर्ता गर्ने क्रममा एमाले छाडेर चुनाव चिन्ह चापाकल लिएर स्वतन्त्र उम्मेदवारी दर्ता गरेका साहले भारी मतान्तरले विजयी बने । उनी अहिले नयाँ पार्टी खोल्न छलफल चलाइरहेका छन् ।

‘नयाँ पार्टी खोल्ने विषयमा छलफल चलिरहेको छ । तर के नाम राख्ने भन्ने निर्णय भइसकेको छैन,’ स्वतन्त्र सांसद साहले भने । तत्कालीन नेकपा सरकारको पालामा साह माओवादी केन्द्र छाडेर एमाले प्रवेश गरेका थिए ।

निर्वाचनमा स्वतन्त्र उम्मेदवारी दिएपछि एमालेले उनलाई साधारण सदस्यसमेत नरहने गरी पार्टीबाट निष्कासन गरिसकेको छ । प्रदेश र प्रतिनिधिसभा निर्वाचनमा मधेश प्रदेशमा साहको बलियो पकड देखिएको छ । रौतहट २ मा उनी निकट किरण साह विजयी भएका छन् ।

मोरङ ४ मा निर्वाचित योगेन्द्र मण्डलसमेत प्रभु साह निकट मानिन्छ । त्यसैले उनीसँग तीनजना प्रतिनिधिसभा सदस्य छन् । मधेस प्रदेशमा प्रभु साह निकट तीन–चारजना निर्वाचित छन् । सबैतिरबाट पार्टी खोलेरै राजनीति गर्न सुझाव आएकाले नयाँ पार्टी गठनको आन्तरिक तयारीमा लागेको साहको भनाइ छ ।