इलाम १ मा पुनः मतदानको माग गर्दै झलनाथ खनाल पुगे सर्वोच्च

२७ मंसिर, काठमाडौं । नेकपा (एकीकृत समाजवादी)का नेता झलनाथ खनालले आफू उम्मेदवार रहेको इलाम क्षेत्र नं. १ मा पुन: मतदानकाे माग गरेका छन् ।

नेता खनालले उक्त क्षेत्रकाे निर्वाचन परिणाम बदर गरी पुनः मतदानकाे लागि अन्तरिम आदेशकाे माग राखी मंगलबार सर्वोच्च अदालतमा रिट दिएका छन् ।

धाँधली गरी आफ्ना प्रतिस्पर्धीलाई निर्वाचित गराइएको आराेप खनालले रिटमा लगाएका छन् । त्यहाँ खनाललाई पराजित गर्दै एमालेका महेश बस्नेत झिनाे मतले विजयी भएका छन् ।

सर्वोच्च अदालतको संवैधानिक इजलासमा दर्ता भएको रिटमा अनालले निर्वाचन आयोग, इलाम १ को निर्वाचन अधिकृतको कार्यालय, इलामको मुख्य निर्वाचन अधिकृत, जिल्ला निर्वाचन कार्यालय इलाम, जिल्ला निर्वाचन अधिकारी अनि संघीय संसद सचिवालयलाई समेत विपक्षी बनाएका छन् ।