आज राती फ्रान्स र मोरक्को भिड्दै, को पुग्ला फाइनलमा ?

२८ मंसिर, काठमाडौं । फिफा विश्वकप कतार २०२२ को दोस्रो सेमिफाइनलमा आज (बुधबार) राति साविक विजेता फ्रान्सले अफ्रिकी राष्ट्र मोरक्कोसँग प्रतिस्पर्धा गर्दैछ ।

यो खेल नेपाली समयअनुसार आज राति १२ः४५ बजेपछि हुनेछ । साविक विजेता फ्रान्सको यो सातौं विश्वकप सेमिफाइनल हुनेछ । फ्रान्सले यसअघि १९५८, १९८२, १९८६, १९९८, २००६ र २०१८ मा सेमिफाइनल खेलिसकेको छ । त्यसमा तीनपटक सेमिफाइनल पार गर्दै दुईपटक १९९८ र २०१८ मा च्याम्पियन बनी इतिहास रचिसकेको छ ।

यसअघिको तीन संस्करणको च्याम्पियन २०१० मा इटाली, २०१४ मा स्पेन र २०१८ मा जर्मनी समूह चरणबाटै बाहिरिएको सन्दर्भमा आफ्नो टोली त्यसलाई पार गरेर सेमिफाइनलमा पुग्दा प्रशिक्षक डेसच्याम्प्स सन्तुष्ट छन् । फ्रान्सको काँधमा ठूलो अपेक्षा छ ।

यता मोरक्को पनि स्पेन र पोर्चुगललाई हराएर अफ्रिकाबाट सेमिफाइनलमा पुग्ने पहिलो देश बनेको छ । मोरक्को त्यही सनसनीपूर्ण प्रदर्शन गर्दै विश्वकपको इतिहासमा पहिलोपटक फाइनल पुग्ने लक्ष्यमा आज राती मैदान उत्रिदै छ ।

यस्तै फ्रान्सले पनि जारी कतार विश्वकपमा समूह चरणमा अष्ट्रेलिया, डेनमार्कलाई पराजित गर्दा ट्युनिसियासँग हार बेहोरेपनि समूह विजेता बनेको थियो । प्रि–क्वाटरफाइनलमा पोल्यान्डलाई र क्वाटरफाइनलमा इंग्ल्यान्डलाई हराएर फ्रान्सले अन्तिम चारको यात्रा तय गरेको हो ।

टोलीसँग स्टार फरवार्ड केलियन एमबाप्पेसँगै भेट्रान फरवार्ड ओलिभर जिरुडको साथ रहेको छ । यी दुईको यस विश्वकपमा गज्जवको समन्वय मिलेको छ । ओलिभर जिरुडले मोरक्कोविरुद्ध गोल गर्न सके उनी एकै विश्वकपमा पाँच गोल गर्ने इतिहासकै सबैभन्दा पाका खेलाडी बन्नेछन् ।

यता, मोरक्को विश्व विजेता फ्रान्सलाई स्तब्ध पार्दै मोरक्कोको इतिहासमा पहिलो पटक फाइनल पुग्ने लक्ष्यमा मैदान उत्रनेछ । यस विश्वकपमा मोरक्कोले थुप्रै इतिहास बनाइसकेको छ । मोरक्को विश्वकपको इतिहासमा सेमिफाइनलमा पुग्ने पहिलो अफ्रिकी टोली हो ।

मोरक्को अपराजित रहँदै सेमिफाइनलमा पुग्न सफल टोली हो । मोरक्कोले समूह चरणमा क्रोएसियासँग गोलरहित बराबरी, बेल्जियम र क्यानडालाई हराउँदै समूह विजेता बन्यो । प्रि–क्वाटरफाइनलमा स्पेनलाई पेनाल्टी सुटआउटमा तथा क्वाटरफाइनलमा पोर्चुगललाई पराजित गरेर मोरक्कोले अन्तिम चारको यात्रा तय गर्न सफल भएको टोली हो । मोरक्कोले आफ्नो विश्वकप अपराजित दौडलाई ६ खेलसम्म लम्ब्याएको छ, जुन अफ्रिकी राष्ट्रका लागि कीर्तिमान हो ।