२० सीटसहित संसद छिरेको रास्वपाले कुन पक्षलाई गर्छ समर्थन ?

४ पुस, काठमाडौं । सरकार सरकारमा सहभागि हुँदा कुन पक्षलाई समर्थन दिने भन्नेबारे राष्ट्रिय स्वतन्त्र पार्टी (रास्वपा) ले आज निर्णय हुँने जनाएको छ । सोमबार (आज) बस्ने संसदीय दल र केन्द्रीय समितिको बैठकले सरकारमा सहभागि हुँदा कुन पक्षलाई समर्थन गर्ने भन्नेबारे निर्णय गरिने सो पार्टीका कविन्द्र बुर्लाकोटीले जानकारी दिएका छन् ।

पार्टी संसदीय दलको नेतामा भने पार्टी सभापति रवि लामिछाने चयन भएका छन् । आज बसेको दलको बैठकले लामिछानेलाई संसदीय दलको नेतामा चयन गरेको हो । दलको बैठकले प्रारम्भिक निर्वाचनमा निर्विरोध निर्वाचित भएका लामिछानेलाई संसदीय दलको नेता अनुमोदन गरेको बताइएको छ ।

दलको उपनेता, प्रमुख सचेतक र सचेतक भने चयन पनि आजै हुने बताइएको छ । सोमबार बिहान ११ बजे बोलाइएको संसदीय दल र केन्द्रीय समितिको संयुक्त बैठकले बाँकी पद पूर्ति गर्ने रास्वपाले जनाएको छ । सरकारमा जाने कि नजाने भन्ने विषयमा पनि सोही बैठकमा छलफल हुने बताइएको छ ।

रास्वपा अध्यक्ष लामिछानेले यसअघि सरकारमा सहभागि हुनेबारे विभिन्न दलका नेताहरुसँग छलफल गरेको छन् । यसैक्रममा उनले नेकपा एमालेका अध्यक्ष केपी शर्मा ओलीसँग पनि भेट गरेका थिए । गत मंसिर ४ मा भएको प्रतिनिधि सभा निर्वाचनमा मात्र भाग लिएको रास्वपाले प्रत्यक्षमा ७ र समानुपातिकमा १३ सिट जितेको छ ।