बैंकहरुमा थुप्रियो निक्षेप, ब्याजदर विवादले भएन कर्जा विस्तार

४ पुष, काठमाडौं । बैंक तथा वित्तीय संस्थाहरुमा संकलित निक्षेपको अनुपातमा कर्जा विस्तार नहुँदा अर्को समस्या देखिएको छ । ब्यादरको विषयमा चलेको विवाद अन्त्य नभएकाले कर्जा लगानी सुस्ताएको बैंकरहरुको भनाइ छ । यतिबेला निक्षेपको अनुपातभन्दा कर्जा प्रवाहको अनुपात कसिलो हुनुपर्नेमा त्यसो हुन सकिरहेको छैन् । बैंक र व्यापारीबीच विवाद चलिरहकै छ ।

चाडवाड र निर्वाचन पछि मंसिर महिनामा वाणिज्य बैंकहरुमा कुल ५८ अर्ब रुपैयाँ निक्षेप थपिएको छ । नेपाल बैंकर्स एसोसिएसनले सार्वजनिक गरेको तथ्यांकअनुसार कात्तिक मसान्तसम्म कुल ४५ खर्ब ६३ अर्ब रुपैयाँ निक्षेप संकलन भएकोमा मंसिर मसान्तसम्म आउँदा ४६ खर्ब २१ अर्ब रुपैयाँ पुगेको छ ।

मंसिरको अन्तिम साता मात्रै २३ अर्ब रुपैयाँ निक्षेप थपिएको हो । निक्षेपमा सामान्य सुधार देखिँदा कर्जा विस्तार भने सुस्त देखिएको छ । मंसिर महिनाभर थप २ अर्ब मात्रै कर्जा प्रवाह भएको छ । कात्तिक मसान्तसम्म ४२ खर्ब २२ अर्ब रुपैयाा कर्जा प्रवाह भएकोमा मंसिर मसान्तसम्म ४२ खर्ब २४ अर्ब रुपैयाँ कायम भएको छ । कात्तिक महिनामा पनि २ अर्ब मात्रै कर्जा विस्तार भएको थियो ।

पुस मसान्तमा कर भुक्तानी, लाभांश–बोनसका पैसा पनि क्रमशः बाहिरिँदा कर्जा लगानी क्षमता कसिलो हुन सक्ने बैंकरहरु बताउँछन् । मंसिरमा बैंकले निक्षेपको ब्याजदरलाई यथावत् राखेका थिए । यसैले निक्षेपमा आकर्षण पनि कात्तिककै जस्तो रहने देखिएको हो । यता बैंकको कर्जा निक्षेप अनुपात औसत ८७.१९ प्रतिशत रहेको थियो । मंसिर पहिलो सातामा आइपुग्दा सिडी रेसियो झन् खुकुलो भएर ८६.९१ प्रतिशतमा सीमित भएको थियो ।

यसले कर्जा दिने क्षमता केही खुकुलो भएपनि जान सकेको छैन् । नेपाल राष्ट्र बैंकले असार मसान्तपछि सिडी रेसियो ९० प्रतिशत हुनैपर्ने व्यवस्था गरेकाले यतिबेला बैंकले ३.५ प्रतिशतको कुसन राखेको बताइन्छ । हरेक बैंकले सिडी रेसियो १–२ प्रतिशतको कुसनमा राखेर बस्न जरुरी भएकाले बढीमा ८७ प्रतिशत सिडीलाई राम्रो मान्न सकिने बैंकरको भनाइ छ । असोजको तुलनामा कात्तिक मसान्तमा बैंकको कुल कर्जा प्रवाह १ अर्ब २६ करोडले बढेर ४२ खर्ब २१ अर्ब ५८ करोड रुपैयाँ पुगेको थियो ।