कांग्रेस संसदीय दलको चुनाव ६ गते, प्रतिस्पर्धामा देउवा,शेखर र गगन

४ पुष, काठमाडौं । नेपाली कांग्रेस संसदीय दलको निर्वाचन बुधबार हुने भएको छ । संसदीय दलको निर्वाचन गर्न बनेको तीन सदस्यीय निर्वाचन समितिले बुधबार चुनाव गर्ने निर्णय गरेको छ । कांग्रेस केन्द्रीय कार्यसम्पादन समितिको आइतबार बसेको बैठकले संसदीय दलको निर्वाचन गर्न समिति बनाएको थियो । सहमहामन्त्री भिष्मराज आङदेम्बेको संयोजकत्वमा रहेको समितिमा केन्द्रीय सदस्यहरु पुष्पा भुसाल र प्रकाश रसाईली स्नेही सदस्य छन् ।

संसदीय दलको नेताका आकांक्षी धेरै भएकाले अहिले भरसक सहमति गराउने प्रयासमा समिति लागेको छ । तर, सहमतिको सम्भावना देखिएको छैन् । सहमति हुन नसके बुधबार चुनाव गराउने समतिको तयारी छ । संसदीय दलमा हालसम्म तीनजनाको आकांक्षा देखिएको छ । सभापति तथा प्रधानमन्त्री शेरबहादुर देउवा संस्थापन टिमबाट र इतरसमूहबाट नेता शेखर कोइराला र महामन्त्री गगनकुमार थापा दलको नेता लड्ने तयारीमा छन् ।

संसदीय दल नेताका लागि संस्थापन पक्षबाट शेरबहादुर देउवा एक्ला उम्मेदवार हुन् । उनलाई चुनौती दिने घोषणा धेरै समयअघि नै महामन्त्री गगन थापाले गरेका थिए भने अहिले संस्थापन इतरसमूहको नेतृत्व गरिरहेका डा. शेखर कोइराला पनि अगाडी आएका छन् ।

इतरसमूहबाट कोइराला र महामन्त्री थापाबीच पनि संसदीय दलको को उठ्ने भन्न सहमति भइसकेको छैन् । पार्टीको १४ औं महाधिवेशनमा सभापतिका प्रत्याशी रहेका कोइरालाको प्यानलबाटै थापाले लोकप्रिय मतका साथ महामन्त्री जितेका थिए । कोइरालाले पछिल्लो पटक उम्मेदवार दिने मनस्थिति बनाएका छन् । कोइरालालाई उम्मेदवार नबनाउँदा आफ्नो प्रभाव घट्ने र गगनलाई नेता मान्नुपर्ने भन्दै इतरपक्षका केही नेताको साझा उम्मदेवार बनाउने प्रयासमा छन् ।

संस्थापनइतर पक्षबाट एउटै उम्मेदवार बनाउने प्रयत्न जारी राखेका नेताहरुले दुइटा उम्मेदवार बन्दा पार्टीभित्र आफ्नो स्थिति अझै कमजोर हुने भन्दै दुवै नेता एकठाउँमा आउनुपर्नेमा जोड दिइरहेका छन् । १४ औं महाधिवेशनमा तटस्थ रहेका नेता रामचन्द्र पौडेलको सहयोग संसदीय दलमा कसलाई हुन्छ भन्ने प्रस्ट भइसकेको छैन । पूर्वमहामन्त्री कृष्णप्रसाद सिटौला पक्षमा रहेका एक मात्रै सांसद प्रदीप पौडेल देउवालाई साथ दिने मनस्थितिमा देखिएका छन् ।

८९ सांसद रहेको कांग्रेसमा शेखर र गगन पक्षमा ३२ सांसद छन् । प्रकाशमान सिंह, सिटौला, शशांक र रामचन्द्र पौडेलको पक्षमा केही सांसद भए पनि बहुमत देउवाको पक्षमा छ । यसैले देउवा सहजै संसदीय दलको नेता चुनिने सम्भावना छ । संसदीय दलको नेतामा हार्ने निश्चित हुँदा पनि कोइराला र थापाबीच सहमति भएको छैन् । राष्ट्रपतिले संविधानको उपधारा–२ अनुसार प्रतिनिधिसभामा बहुमत प्राप्त गर्न सक्ने सदस्यलाई प्रधानमन्त्रीमा दाबी पेश गर्न आव्हान गरीसकेकी छन् ।

यस्तो छ निर्वाचन कार्यतालिका 

१. निर्वाचन हुने पदः नेपाली कांग्रेस संसदीय दलको नेता

२. मतदाता नामावली प्रकाशनः २०७९ पौष ४ गते दिउँसो २ः०० बजे ।

३. मतदाता नामावली उपर दावी विरोध (छुट वा सच्याउने) २०७९ पौष ४ गते २ः३० बजेदेखि ३ः०० बजेसम्म ।

४. दावी विरोध उपर जाँचबुझ गरी अन्तिम नामावली प्रकाशन गर्ने: २०७९ पौष ४ गते दिउँसो ४ः०० वजे ।

५. उम्मेदवारको लागि दरखास्त: २०७९ पौष ५ गते विहान ८ः०० वजेदेखि १०ः०० वजेसम्म ।

६. उम्मेदवारको प्रथम नामावली प्रकाशन: २०७९ पौष ५ गते विहान १०ः३० वजे । ७. उम्मेदवारको दरखास्त उपर दावी विरोधी: २०७९ पौष ५ गते विहान ११ः०० वजेदेखि ११ः३० वजेसम्म ।

८. दावी विरोध उपर जाँचबुझ गरी उम्मेदवारको दोस्रो नामावली प्रकाशन: २०७९ पौष ५ गते दिउँसो १२ः०० वजे ।

९. उम्मेदवारले नाम फिर्ता लिने: २०७९ पौष ५ गते दिउँसो १२ः३० वजेदेखि दिउँसो २ः३० वजेसम्म ।

१०. उम्मेदवारको अन्तिम नामावली प्रकाशन: २०७९ पौष ५ गते दिउँसो ३ः०० बजे ।

११. मतदान: २०७९ पौष ६ गते विहान ८ः०० बजेदेखि १०ः०० बजेसम्म ।