जग्गाको वर्गिकरण सकियो, अब कित्ताकाट खुलाउ : मेयर सिंह

४ पुष, बीरगञ्ज । बीरगञ्ज महानगरपालिकाका नगरप्रमुख राजेशमान सिंहले महानगरले जग्गा वर्गिकरणको काम सम्पन्न गरेको भन्दै मालपोत कार्यालयका प्रमुखलाई कित्ताकाट सुरु गरेर जनताका दैनिक समस्या समाधान गर्न आग्रह गरेका छन ।

जिल्ला मालपोत कार्यालय परिसरमा शनिबार बिहान आयोजित कार्यक्रमकाबीच उनले मालपोत कार्यालयका प्रमुख ऋषि कुमार दाहाललाई यस्तो आग्रह गरेका हुन् । महानगरले ३२ वटै वडामा रहेका जग्गालाई विभिन्न ७ थरीमा वर्गिकरण गरेको छ । वर्गिकरणका लागि रोकिएको कित्ताकाट वर्गिकरण सम्पन्न भएसँगै अब खुला गर्नु पर्नेमा नगरप्रमुख सिंहले जोड दिए ।

मेयर सिंहले मालपोत कार्यालयलाई व्यवस्थित गर्दै मालपोत, नापी र भूमीसुधार कार्यालयका लागि बहुतले भवनको आवश्यकता रहेको औँल्याउँदै भवनको नक्सा बनाएर ल्याए भवन निर्माणका लाग आफूले पनि पहल गर्ने बताए।

यस्तै नगरप्रमुख सिंहले मालपोत कार्यालयमा आउने सेवाग्राहीलाई सुविधाजनक बस्ने स्थान र शौचालयको निर्माण महानगर आफैँले गरिदिने बताए । उनले कार्यालय अगाडीको सडकमा जथाभावी सवारी साधन नराखी तोकिएको स्थानमा मात्रै पार्किङ गर्न पनि लेखापढी व्यवसायी र सेवाग्राहीलाई अनुरोध गरे ।

कार्यक्रममा मालपोत कार्यालय पर्साका प्रमुख ऋषि कुमार दाहाल, लेखापढी व्यवसायी संघका अध्यक्ष मदन पटेल, नगर कार्यपालिका सदस्य खैरुद्दिन हवारी, लेखापढी व्यवसायी तथा स्थानीय बासीन्दाको उपस्थिति रहेको थियो ।