समर्थनबारे जसपामा दुई धार, सत्ता गठबन्धनमै फर्कने यादवको संकेत

५  पुष, काठमाडौं । राष्ट्रपति विद्यादेवी भण्डारीले नयाँ सरकार गठनका लागि दावी पेस गर्न एक हप्ताको समय दिएर पत्र पठाएपछि संघीय संसदमा प्रतिनिधित्व गर्ने राजनीतिक दलहरु कुन पक्षलाई साथ दिने भन्नेबारे छलफलमा जुटेको छन् । यसै क्रममा जनता समाजावादी पार्टी (जसपा)ले पनि आन्तरिक छलफल सुरु गरेको छ । उसले सत्ता पक्ष र विपक्ष कुन पक्षमा उभिने भन्ने पार्टीगत निर्णय भने गरेको छैन् ।

नेकपा विभाजनपछि सत्ता गठबन्धनमा रहेको जसपा सीट बाँडफाँटमा सहमति नभएपछि एमालेसँग सहकार्य गरेर प्रदेश र प्रतिनिधिसभाको निर्वाचनमा गएको थियो । निर्वाचनमा अपेक्षाकृत नतिजा नआएपछि अध्यक्ष उपेन्द्र यादवाले एमालेसँगको सहकार्य सकिएको घोषणा गरेका थिए । त्यस यता उनको आधिकारिक धारणा बाहिर नआएपनि पुरानै गठबन्धनलाई सभाउने पक्ष्ँमा रहेको जसपाका नेताहरु बताउँछन् । अहिलेसम्म राष्ट्रिय प्रजातन्त्र पार्टी (रास्वपा) ले सत्ता गठबन्धनलाई समर्थन नगर्ने संकेत गरेको छ भने राष्ट्रिय स्वतन्त्र पार्टीले सरकारमा जाने निर्णय गरेको छ ।

रास्वपाले सरकारमा जाने निर्णय गरेपनि सत्ता गठबन्धनलाई सघाउने भनिसकेको छैन् । उसले एजेण्डामा आधारित रहेर छलफल भएपछि त्यसैलाई आधार बनाएर निर्णय लिने भनेको छ । लोकतान्त्रिक समाजावदी पार्टीले सत्ता गठबन्धनलाई सघाउने निश्चित छ । सबै दलले धमाधम निर्णय लिन थालेपछि जसपाले पनि नयाँ बन्ने सरकारमा सहभागी हुन नेपाली कांग्रेस नेतृत्वको गठबन्धनमा फर्कन संकेत गरेको छ ।

यद्यपी जसपामा यही विषयलाई लिएर दुई धार देखिएको छ । बरिष्ठ उपाध्यक्ष अशोक राई र नेता राजेन्द्र श्रेष्ठले अहिले नै एमालेसँगको सहकार्य नसकिएको बताएका छन् भने अन्य प्राय नेताहरुको भनाई अध्यक्ष यादवको पक्षमै छ । एमालेसँगको सहकार्यले पार्टीलाई नोक्सानी पुगेको जसपाका नेताहरूको बुझाइ छ । यसैले पनि अहिले फेरि गठबन्धनमै फर्किने र सरकारमा सहभागि बन्ने गरी जसपा नेताहरूले पार्टीभित्र छलफल चलाइरहेका छन् ।

प्रधानमन्त्री र सत्ता सहकार्यका विषयमा जसपा अध्यक्ष यादवले माओवादी अध्यक्ष पुष्पकमल दाहाल‘प्रचण्ड’सँग दुईपटक भेट गरिसकेका छन् । दाहालसँग भेट गरी यादव शनिबार रौतहट पुगेका थिए । उनी काठमाडौं फर्केर सरकारको विषयमा गम्भीर छलफल गर्ने जसपाकै प्रवक्ता मनीष सुमनले नेपाल बहसलाई जानकारी दिए । दुईवटै गठबन्धन छलफलमा खुल्ल रहेपनि पहिलेकै गठबन्धनलाई सघाउने सम्भावना बढी रहेको उनको भनाइ छ ।

जसपालाई कांग्रेस नेतृत्वको गठबन्धनमा ल्याउन माओवादी केन्द्रका अध्यक्ष दाहालले प्रधानमन्त्री एवं नेपाली कांग्रेसका सभापति शेरबहादुर देउवासाँग पनि छलफल चलाउका छन् । अन्तिम समयमा जसपाले गठबन्धन छाडेर एमालेसँग चुनावी गठबन्धन गर्न गएकोमा देउवाले उतिबेला आपत्ति जनाएपनि अहिले ढोका खुल्ला रहेको बताएका छन् । जसपाको प्रतिनिधिसभामा प्रत्यक्षतर्फ ७ र समानुपातिक तर्फ ५ गरी १२ सीट छ ।

यसैगरी लोकतान्त्रिक समाजवादी पार्टी (लोसपा) का नेताहरूले पनि वर्तमान सत्ता गठबन्धनमा आफ्नो हक लाग्ने बताउँदै आएका छन् । गठबन्धनको बैठकमा सहभागि गराउनेबारे लोसपाका अध्यक्ष महन्थ ठाकुरले दुईतीनपटक प्रधानमन्त्री देउवालाई भेटेका छन् । लोसपा कार्यकारिणी समितिका सदस्य केशव झाले पनि लोसपा कांग्रेस–माओवादी गठबन्धनमै रहेको तर, सम्मानजनक शक्ति बाँडफाँटमा कुरा हुन बाँकी रहेको बताएका छन् ।

प्रतिनिधिसभामा ६ सिट रहेको अर्को तराई–मधेस केन्द्रित जनमत पार्टीले सरकारमा जाने सहमति भइसकेको छ । केही दिनअघि प्रधानमन्त्री देउवासँग भेट गरी जनमत पार्टीका अध्यक्ष सिके राउतले सरकारमा जाने सहमति गरेका हुन् । उता, राप्रपा अध्यक्ष राजेन्द« लिङदेनले तत्काल सरकार नजाने बताए पनि अधिकांश नेताहरु भने सरकारमा जानुपर्ने पक्ष्ँमा देखिएका छन् । यी सबै राजनीतिक परिदृष्यले पनि जसपा कांग्रेस नेतृत्वको गठबन्धनमा नै फर्कने आंकलन गरिएको छ ।