शेखरको समर्थनमा थापाले दलको नेतामा देउवासँग प्रतिस्पर्धा गर्ने

५ पुष, काठमाडौं । नेपाली कांग्रेसको संस्थापन इतरसमूहमा संसदीय दलको नेतामा प्रतिस्पिर्धा गर्नेबारे सहमति जुटेको छ । सहमति अनुसार इतरसमूहले दलको नेताको उमेदवारमा गगन थापालाई अघि सार्ने भएको छ । थापालाई इतरसमूहका नेता डा. शेखर कोइरालाले प्रस्ताव गर्ने भएका छन् ।

समहतिबारे जानकारी दिन सिंहदरबार नजिकै रहेको बसेरा होटलमा इतरसमूहका केन्द्रीय सदस्य र सांसदहरुलाई छलफलका लागि बोलाइएको छ । अहिले नेता र सांसदहरु सो होटलमा जानेक्रम जारी छ । अब कांग्रेस संसदीय दलको नेतामा पार्टी सभापति शेरबहादुर देउवाविरुद्ध महामन्त्री गगन थापाले प्रतिस्पर्धा गर्नेछन् । शेखर कोइरालासँग सोमबार र मंगलबार दुई दिन भएको छलफलमा गगनले देउवाविरुद्ध उम्मेदवारी दिने सहमति जुटेको हो ।

सोमबारको छलफल टुंगोमा नपुगेपछि आज बिहान पुनः कोइराला र थापा पक्षबीच छलफल भएको थियो । सो छलफलमा थापा संसदीय दलको नेताको उम्मेदवार बन्ने र कोइराला प्रस्तावक बन्ने सहमति भएको छलफलमा सहभागी एक नेताले जानकारी दिए । संसदीय दलको नेताका लागि उम्मेदवार।ी दर्ता पनि आजै ताकिएको छ भने भोली बुधबार निर्वाचन हुँदैछ ।