कांग्रेस संसदीय दलको मतदान सकियो, मतगणना सुरु हुँदै

६ पुष, काठमाडौं । नेपाली कांग्रेस संसदीय दलको नेता चयनका लागि मतदान सकिएको छ । प्रतिनिधिसभामा प्रत्यक्ष र समानुपातिकबाट निर्वाचित ८९ सदस्यले दलको नेतााका प्रत्यासी सभापति शेरबहादुर देउवा र महामन्त्री गगन थापालाई मतदान गरेका छन् । भइरहेको मतदानमा ‘नियम विपरीत’ मतदान कक्षमै मोबाइल लगेको भन्दै विवाद पनि सुरु भएको छ ।

सिंहदरबारस्थित संसदीय दलको कार्यालयमा बुधबार बिहान ८ देखि १० बजेसम्म मतदानको समय निर्धारण गरिएको थियो । तर, मतदान केन्द्रमा मतदातालाई मोबाइल लैजान दिने कि नदिने विषयमा निर्वाचन समितिमा रहेका संस्थापन र इतर समूहबीच सहमति नजुट्दा मतदान ढिलोगरी सुरु भएको थियो ।
दलको नेताका उमेदवार गगन थापाले पत्रकारहरुसँग कुरा गर्दै मोबाइल लगेको भेटिएको बताए । यसअघि कांग्रेसको दलको नेता चयनका लागि मोबाइल लैजाने कि नलैजाने भन्ने विषयमा विवाद भएको थियो । विवादपछि मोबाइल नलैजाने सहमति बनेको थियो ।