सिंहदरवार परिसरमै सुरक्षाकर्मीबाट रोकिए गृहमन्त्री खाँण !

६ पुष, काठमाडौं । नेपाली कांग्रेसको संसदीय दलको नेताको चुनाव गर्न तयार पारिएको मतदान स्थलमा जान खोजेका गृहमन्त्री बालकृष्ण खाँणलाई सुरक्षाकर्मीले रोकेका छन् । संस्दीय दलको निर्वाचनमा मतदान स्थलभित्र छिर्न सांसदबाहेर अरुलाई निषेध गरिएकाले खाँण पनि रोकिएका हुन् ।

खाँण गत मंसिर ४ मा भएको आम निर्वाचनमा पराजित भएका थिए । उनले मतदान गर्न नपाउने भएपछि सुरक्षााकर्मीले उनलाई रोकेका हुन् । उनीसँगै बहालवालामन्त्री र पुर्वसांसद पनि रोकिएका थिए । कांग्रेस संसदीय दलको नेता चयनका लागि बुधबार बिहान ८ बजेदेखि मतदान हुने तयारी थियो ।

त्यो भन्दा अगाडी नै गृहमन्त्री खाँण लगायतका नेता र मन्त्रीहरु त्यहाँ उपस्थित भइसकेका थिए । मतदानस्थलमा मतदातालाई मोबाइल लैजान दिने कि नदिने भन्ने विवादले मतदानमा केही समय ढिलाइ पनि भएको थियो । मतदानस्थलमा सुरक्षा व्यवस्था कडा पारिएको थियो ।

मतदाता नामावली हेरेर मात्र सांसदहरूलाई भित्र प्रवेश गर्न दिइएपछि मतदानस्थलमा बहालवाला मन्त्रीहरूलाई प्रवेशगर्न नदिइएको हो ।
गृहमन्त्री बालकृष्ण खाँण र महिला, बालबालिका तथा ज्येष्ठ नागरिक मन्त्री उमा रेग्मीहरूलाई सुरक्षाकर्मीले रोकेका थिए ।

यसपछि मन्त्रीलगायत गैरसांसद नेताहरू मतदानस्थलबाहिरै बसेका थिए । कांग्रेस संसदीय दलको नेता चयनका लागि ८९ जना सांसदले मतदान गरेका छन् । जसमा सभापति देउवाले ६४ र महामन्त्री गगनले २५ मत ल्याए ।