चर्को ब्याजदरविरूद्ध मोरङका उद्योगी व्यवसायीद्वारा राष्ट्र बैंकमा धर्ना

७ पुष, माेरङ । चर्को ब्याजदर र बैंकिङ नीतिविरुद्ध मोरङका उद्योगी व्यवसायीले बिहीबार विराटनगरस्थित राष्ट्र बैंकको मुख्य गेटमा धर्ना दिएका छन् । उद्योग सगंठन, मोरङ व्यापार संघ, विराट व्यापार संघ, नेपाल उद्योग परिसंघ लगायत मोरङका ४० भन्दाबढी औद्योगिक संस्थाहरूले पाँच बुँदे मागसहित आन्दोलन सुरू गरेका छन् । साेही क्रममा साँझ पाँच बजेसम्म धर्ना दिएका हुन् ।

उनीहरूले ‘ब्याजदर साह्रो भयो’, ‘गरिखान गाह्रो भो’, ‘बैंकको ब्याज साह्रो भयो’, ‘कारोबार गर्न गाह्रो भो’ लगायत नारा लेखिएका प्ले कार्ड प्रदर्शन गरेका छन् ।

उद्योग परिसंघ प्रदेश १ का अध्यक्ष भीम घिमिरेले बैंकको गलत नीतिको शिकारका कारण उद्योगीले उद्योग–व्यवसायबाट पलायन हुनुपर्ने अवस्था आएको बताउँदै चालू पुँजी कर्जा निर्देशिका खारेज गर्न माग गरे । उनले एकल अंकको ब्याजदर कायम गर्नुपर्ने माग गरे ।

उनले भने, ‘सम्पूर्ण उद्योग–व्यवसाय घाटामा छन् । बैंकमात्र नाफामा छ । हामी राष्ट्र बैंकको गेटबाट त्यसै फर्कँदैनौं । बरु हामी गोली खान तयार छौं ।’

मोरङ व्यापार संघका अध्यक्ष नवीन रिजालले विश्वकै अर्थतन्त्र धरापमा परिरहेको बेला नेपाल सरकारले उद्योगी–व्यवसायीलाई थप पीडा दिने उद्देश्यले कडा नीति ल्याएकाे बताउँदै विराेध गरे ।

चालु पुँजी कर्जा निर्देशिका खारेज गरिनुपर्ने, एकल अंकको बैंक ब्याजदर कायम गरिनुपर्ने, स्प्रेडदर अधिकतम् २ प्रतिशत हुनुपर्ने, संस्थागत ब्याजदर २ प्रतिशत निर्धारण गर्नुपर्ने तथा बैंकर र व्यवसायी अलग गर्नुपर्ने उनीहरूको माग छ ।