इन्भेष्टमेण्ट बैंक र मेगा बैंकबीचको मर्जर अन्तिम चरणमा, लगानीकर्तालाई ११ प्रतिशतको लाभांश दियो इन्भेष्टमेण्ट बैंकले

८ पुष, काठमाडौं । नेपाल इन्भेष्टमेण्ट बैंक र मेगा बैंक नेपालबीच मर्जरमा जाने अन्तिम निर्णय भएको छ । काठमाडौंमा बिहीबार नेपाल प्रज्ञा प्रतिष्ठान कमलादीको हलमा भएका बैंकको ३६ औं वार्षिक साधारणसभाले दुई बैंक बीच मर्जमा जाने यसअघिको सहमतिलाई अन्तिम रुप दिएको हो ।

हिजै मेगा बैंकले पनि विशेष साधारणसभा गर्दै मर्जमा जाने प्रस्ताव पारित गरेको थियो । साधारणसभाबाट पारित भएपछि अब छिट्टै मर्जर प्रकृया सम्पन्न गर्ने निर्णय पनि गरेको छ । दुवै बैंकले चाँडै नै संयुक्त कारोबार गर्ने क्रममा रहेका छन् ।

सो साधारणसभाले आर्थिक वर्ष २०७८/७९ बाट चुक्ता पुँजीको ४ प्रतिशत बोनस शेयर र ७ प्रतिशत नगद गरी कुल ११ प्रतिशत लाभांश लगानीकर्ताहरुलाई वितरण गर्ने प्रस्ताव पनि पारित भएको छ । सञ्चालक समितिले प्रस्ताव गरेको चुक्ता पुँजीको ४ प्रतिशत बोनस शेयर पारित गरेसँगै नेपाल इन्भेष्टमेण्ट बैंक लिमिटेडको चुक्ता पुँजी १९ अर्ब ३ करोड रुपैयाँ पुगेको छ ।

इन्भेष्टमेण्ट बैंकले आर्थिक वर्ष २०७८/७९ मा ६ अर्ब २८ करोड रुपैयाँ सञ्चालन मुनाफा तथा ३ अर्ब ७९ करोड रुपैयाँ खुद मुनाफा आर्जन गरेको छ । निक्षेप अघिल्लो वर्ष १७९ अर्ब ४० करोड रहेकोमा आर्थिक वर्ष २०७८/७९ मा ७ अर्ब ३६ करोड रुपैयाँ बढेर ८६ अर्ब ७६ करोड पुगेको छ । त्यसैगरी कर्जा लगानी तर्फ अघिल्लो वर्ष १६१ अर्ब ९१ करोड रुपैयाँ रहेकोमा आर्थिक वर्ष २०७८/७९ मा २ अर्ब ९१ करोड रुपैयाँ बढेर १६४ अर्ब ८२ करोड रुपैयाँ कायम भएको छ ।

हाल बैंकको ८ वटा शाखा कार्यालय, १३१ वटा एटीएम, २३ वटा एक्सटेन्सन काउण्टर, १० वटा राजश्व संकलन काउण्टर तथा ५९ वटा शाखारहित बैंकिङ सेवामार्फत १० लाख भन्दा बढी ग्राहकहरुलाई बैंकिङ सेवा प्रदान गर्दै आएको छ ।

स्तरीय बैंकिङ सेवा प्रदान गरे् वापत यस बैंकले बेलायतको द फाइनान्सियल टाइम्सले प्रदान गर्ने ‘बैंक अफ द इयर’ अवार्ड छैठौं पटक २०२२ मा प्राप्त गरेको छ । साथै, यस बैंकले अन्तर्राष्ट्रिय प्रकाशन युरोमनीले प्रदान गर्ने ‘बेस्ट बैंक २०१८’ र ‘बेस्ट बैंक २०२१’ को युरोमनी अवार्डहरु समेत प्राप्त गरेको छ ।