राजिव गान्धी हत्याका दाेषीलाई थुनामुक्त गर्न सर्वोच्च अदालतको आदेश

८ पुष, काठमाडौं । भारतको सर्वोच्च अदालतले पूर्वप्रधानमन्त्री राजिव गान्धीको हत्यामा दोषी ठहर भएका ६ जनालाई ३१ वर्षपछि थुनामुक्त गर्न सरकारलाई आदेश दिएको छ ।

घटनामा संलग्न महिला नलिनी श्रीहरन र अन्य पाँच जनालाई रिहाईको आदेश दिएको सिएनएनले लेखेको छ । सन् १९९१ मे २१ मा तामिलनाडुका राजिव गान्धीको आत्मघाती बम हमलामा हत्या भएको थियो । करिब एक दशक राजनीतिमा बिताएका उनी सन् १९८९ को आम निर्वाचनमा पराजित भएका थिए । त्यसको दुई वर्षपछि उनको हत्या भएको थियो ।

घटना भएको एक सातापछि उनीहरू पक्राउ परेका थिए। त्यो घटना श्रीलंकाको विद्रोही समूह तामिलले गरेको आरोप लाग्दै आएको थियो ।
सन् १९८७ मा श्रीलंकाको गृहयुद्ध अन्त्यका लागि भन्दै भारतीय सेना पठाएकोमा रूष्ट विद्रोही तामिल समूहले हत्या गरेको चर्चा हुँदै आएको थियो ।

तामिलनाडु सरकारले जेलमा रहेकालाई रिहाईका लागि केन्द्रीय सरकारसँग माग गर्दै आएको थियो । भारतको सर्वोच्च अदालतले घटनामा संलग्न भनिएका एजी पेरारिवलनलाई गत मे मा रिहाईको आदेश दिएको थियो ।

पेरारिवलनमाथि आत्मघाती बमका लागि ब्याट्री खरिद गरेकाे अभियाेग लगाइएकाे थियाे । साेही अभियाेगमा दाेषी ठहर गर्दै उनलाई जेल पठाइएको थियो । घटनाका बेला उनी १९ वर्षका थिए ।

अंगरक्षकले आमा ईन्धिरा गान्धीको हत्या गरेपछि राजिव गान्धी प्रधानमन्त्री बनेका थिए । उनले आफ्नो शासनकालमा  विद्रोही समूहसँग शान्ति सम्झौतासमेत गरेका थिए ।