प्रधानमन्त्रीको पहिलो कार्यकाल लिनेबारे टुंगो लगाउन देउवा र प्रचण्डबीच बालुवाटारमा निर्णायक वार्ता सुरू

१० पुष, काठमाडौं । प्रधानमन्त्रीको पहिलो कार्यकाल टुंगो लगाउने विषयलाई टुंगो लगाउन प्रधानमन्त्री निवास बालुवाटारमा गठबन्धनका मुख्य दलका नेतृत्वबीच बैठक शुरु भएको छ ।

शुरुमा प्रधानमन्त्रीसमेत रहेका नेपाली कांग्रेसका सभापति शेरबहादुर देउवा र सरकारका एक घटक रहेका नेकपा (माओवादी केन्द्र ) का अध्यक्ष पुष्पकमल दाहाल ‘प्रचण्ड’बीच ‘वान टू वान’ वार्ता शुरु भएको हाे ।

दुईजना बीच प्रधानमन्त्रीको पहिलो कार्यकालबारे सहमति जुटाउने छलफल भइरहेको स्रोतले जनायो । छलफलपछि मात्र अन्य दलका नेताहरुसहितको सामूहिक बैठक शुरु हुने जनाइएको छ ।

नेकपा (एकीकृत समाजवादी) का अध्यक्ष माधवकुमार नेपाल, जनमोर्चाका अध्यक्ष चित्रबहादुर केसी, लोसपाका अध्यक्ष महन्थ ठाकुर, बालुवाटार जाने क्रममा रहेका छन् । सरकार गठनका लागि राष्ट्रपति विद्यादेवी भण्डारीले दिएको एक हप्ताको समयसीमा आज बेलुका ५ बजे सकिँदैछ ।