प्रचण्डकाे सचिवालयले किन दियाे गठबन्धन टुट्न सक्ने संकेत ?

१० पुष, काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’को सचिवालयले सत्ता गठबन्धन टुट्न सक्ने संकेत गरेको छ । प्रचण्डका स्वकीय सचिव रमेश मल्लले आइतबार सामाजिक सञ्जालमार्फत यस्तो संकेत गरेका हुन् ।

उनले राजनीतिमा आफू कमजोर हुँदा एउटा सहमति र माथि पुगे भन्ने भान पर्न थाल्दा सहमति तोडि हाल्ने खराब प्रवृत्ति हाबी भएको समेत बताएका छन् ।

उनले लेखेका छन्, ‘नेपाली राजनीतिको एउटा खराब चित्र र चरित्र यस्तो हुँदै आयो, आफू तल पर्दा एउटा सहमति गर्ने तर आफू माथि पुगे भन्ने भान पर्न थाल्दा सहमति तोडिहाल्ने । पछिल्लो घटनाक्रमले के देखाउँछ कि इतिहासको फेरि दुखान्त पुनरावृत्ति हाम्रा सामु छ।’

उनले पछिल्लो घटनाक्रमले इतिहासको फेरि दुखान्त पुनरावृत्ति देखाएको औंल्याउँदै गठबन्धन विघटनतर्फ अघि बढेको संकेत गरेका छन् ।

गठबन्धनमा नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), राष्ट्रिय जनमोर्चा आवद्ध छन् । गएको मंसिर ४ मा भएको प्रदेश र प्रतिनिधिसभा निर्वाचन लोकतान्त्रिक समाजवादी पार्टीसमेतका गठबन्धन बनाएर चुनावमा गएका थिए । चुनावबाट ८९ सिटसहित कांग्रेस ठूलो दल बनेपछि नयाँ सरकार गठनमा पहिलो प्रधानमन्त्री कसले लिने भन्नेमा सहमति जुटाउन अहिले बालुवाटारमा कांग्रेस माओवादी केन्द्र र एकीकृत समाजवादीबीच निर्णायक वार्ता चलिरहेको छ ।

बैठकमा कांग्रेस सभापति शेरबहादुर देउवा र माओवादी कैन्द्रका अध्यक्ष प्रचण्डले आफूले नै अब बन्ने सरकारका प्रधानमन्त्रीमा पहिलो कार्यकाल पाउनुपर्ने अडान छाडेका छैनन् । सोही कारण आज साँझ ५ बजेसम्मका लागि राष्ट्रिपतिबाट पाएको सरकार गठनको समयसीमामा सरकार गठनका लागि सूची बुझाउन सक्छन् कि सक्दैनन् ? भन्नेबारे आमचासोको विषय बनेको छ ।