पार्टी सभापति र संसदीय दलबाट राजीनामा दिन देउवालाई दवाव

११ पुष, काठमाडौं । प्रधानमन्त्री हठका कारण पार्टीलाई सार्वजनिक उपस्थितिभन्दा बाहिर पुर्याएको भन्दै नेपाली कांग्रेसका सभापति शेरबहादुर देउवालाई राजीनामा दिन दवाव बढेको छ । पार्टीका नेता तथा कार्यकर्ताले देउवा नेतृत्व असक्षम र अलोकप्रिय भएको भन्दै  पार्टी सभापति र संसदीय दलको नेताबाट राजीनामा दिनुपर्ने वा तत्काल विशेष महाधिवेशन बोलाउन माग गरेका छन् ।

सभापति देउवालाई संस्थापन पक्षकै नेताहरुले पनि तत्काल राजीनामा दिएर पार्टीमा आउनसक्ने सम्भावित खतरालाई टार्न सुझाएका छन् । देउवा समूहमा रहेका वरिष्ठ नेता रामचन्द्र पौडेल लगायतका नेताले देउवाले अब निकास दिनुपर्ने र पार्टीलाई यो अवस्थामा पुर्याएको जिम्मेवारी लिनुपर्ने माग गरेका छन् । नभए विशेष महाधिवेशन बोलाउनुपर्ने माग गरेका छन् ।

संस्थापन इतर समूहले आफु पक्षका नेताहरुको बैठक राखेर निर्णय गर्ने तयारी गरेको छ । तर, सो समुहका नेताहरुले सभापति देउवाले तत्कालै राजीनामा गर्नुपर्ने माग सार्वजनिक रुपमै गरिसकेका छन् । इतरसमूहका नेता डा. शेखर कोइरालाले अन्तिम समयमा आएर माओवादी अध्यक्ष पुष्पकमल दाहाल‘प्रचण्डले’ धोका दिएको बताएका छन भने महामन्त्री गगन थापा बोलेका छैनन् ।

कांग्रेस नेता डा.चन्द्र भण्डारीले सामाजिक सञ्जालमार्फत् देउवाको राजीनामा मागेका छन् । उनले भनेका छन्, ‘ठगतन्त्र, बेइमानी र धोकामात्र होइन, तिमी कहाँ छौ र तिम्रा सल्लाहकार कहाँ छन्, घटनाको जिम्मा लिनुपर्छ, पर्दैन प्रमाणित गर !!!’भन्दै विशेष महाधिवेशन बोलाउन आवश्यक भएको बताएका छन् ।

गठबन्धन असफल भएपछि ठूलो दल नेपाली कांग्रेस प्रमुख प्रतिपक्षमा बस्ने भएको छ । सभापति शेरबहादुर देउवा, प्रवक्ता डा. प्रकाश शरण महत, बिमलेन्द्र निधि, प्रकाशमान सिंह, सञ्चारमन्त्री ज्ञानेन्द्र बहादुर कार्की उपसभापति पूर्णबहादुर खड्का र डा. आरजु देउवाको हठका कारण यस्तो अवस्था आइलागेको भन्दै कांग्रेसका नेताहरुले नै राजीनामा माग्न थालेका हुन् । कांग्रेस नेताहरुको भनाइमा अब सभापतिले राजीनामा दिनुपर्छ नभए विशेष महाधिवेशन बोलाउनुपर्छ । कांग्रेसका अर्का नेता गुरुराज घिमिरले पनि सामाजिक सञ्जालमा यही विषयलााई उठाएका छन् ।

उनले लेखेका छन्, ‘नेका सभापति तथा संसदीय दलका नेता शेरबहादुर देउवाले नैतिकताको आधारमा दुवै पदबाट तत्कालै राजीनामा दिनुपर्छ । हिजो पार्टीका साथीहरुले गठबन्धन गलत हो भन्दाभन्दै किन गरियो र आज किन जोगाउन सकिएन ? यसमा सत्तालिप्सा र भजनमण्डली कति जिम्मेवार छ । राजीनामा नदिए चाँडै विशेष महाधिवेशन बोलाइनेछ ।’