मन्त्री टुंग्याउन सात दलको बैठक बस्दै, नयाँ दलले मागे ठूला मन्त्रालय

११ पुष, काठमाडौं । नेकपा माओवादीका अध्यक्ष पुष्पकमल दाहाल प्रचण्डको नेतृत्वमा सरकारमा सामेल भएका सात राजनीतिक दलहरुको बैठक बस्दैछ । सरकार जाने मन्त्री र मन्त्रालयका विषयमा छलफल गर्न प्रचण्डलाई प्रधानमन्त्री बनाउन समर्थन गरेका सात राजनीतिक दलका शीर्ष नेताको बैठक बोलाइएको हो ।

प्रधानमन्त्री प्रचण्डको सचिवालयका अनुसार संसद् भवन नयाँ बानेश्वरमा सउोमबार बिहान ११ बजे बैठक बोलाइएको छ । बैठकमा मन्त्रीको शपथका बारेमा पनि कुराकानी हुने बताएको छ । साना र नयाँ दलले ठूला र महत्वपूण मन्त्रालयमा दावी राखेपछि यसबारे सहमति गर्न बैठक ठाकिएको हो ।

राष्ट्रिय स्वतन्त्र पार्टीले उपप्रधानमन्त्रीसहित गृह या भौतिक मन्त्रालय दिनुुपर्ने अडान राखेको बताइएको छ । यसबाहेक थप श्रमसहित बाँकी दुई मन्त्रालय र उपसभामुखमा दाबी रहेको सो पार्टीले गरेको छ । रास्वपानका एक नेताले भने, ‘हामीले गृह मन्त्रालय भनेका छौँ, त्यो भएन भने भौतिक मन्त्रालयमा अडान रहने छ भने श्रम मन्त्रालय पनि हाम्रो रोजाइमा परेको छ ।’

उनका अनुसार उपसभामुखमा पनि रास्वपासहितका दलको दाबी रहेको छ । सभामुख भने नेकपा एमालेले लिने भएको छ । राप्रपा र जसपाले पनि अर्थ र गृहतिरै नजर लगाएका छन् । नागरिक उन्मुत्रि पाार्टीले भने पार्टीको बैठक पछि निर्णय गर्ने भएको छ । बैठक डिल्लीबजार कारागारमा बोलाइएको छ ।