पीडित उखु किसानको न्यायका लागि सरकारमा जाने सिके राउतकाे भनाइ, उद्योग वा कृषि मन्‍त्रालयमा दाबी

११ पुष, काठमाडौं । सरकारमा सामेल हुने तयारीमा रहेका जनमत पार्टीका अध्यक्ष सिके राउतले उद्योग वा कृषि मन्त्रालयमा दाबी गरेका छन् । सोमबार बस्ने सत्ता गठबन्धनको बैठकमा उनले आफ्नो दाबी प्रस्तुत गर्ने भएका छन् ।

प्रतिनिधिसभामा राउतको ६ जना सांसद छन् । सत्ता गठबन्धनको बैठकपछि सरकारमा जाने व्यक्तिको टुंगो लगाउन पार्टीको बैठक बस्ने भएको छ । राउत तराईमा मिटर ब्याजी पीडित र चिनी मिलबाट पैसा नपाएर हैरानी र उठिवास लागेका उखु किसानहरुको पक्षमा आवाज उठाउने मध्येका पहिलो पंक्तिमा रहँदै आएका छन् ।

सोही विषयलाई उनले चुनावमा एजेण्डा बनाएकै कारण उनी नेतृत्वको पार्टी जनमतले समानुपातिकमा उल्लेख्य मत हासिल गरेको थियो । पीडितहरुले जनमतको उदयसँगै आफूहरुले न्याय पाउने आशा पलाएको बताउँदै आएका छन् ।

सांसद राउतले तराईका वर्षौंदेखिको पीडित उखु किसानहरुको न्यायका लागि आफ्नो पार्टी सरकारमा जाने बताएका छन् ।