कांग्रेस संकटबारे शेखर समूहको छलफलमा विशेष महाधिवेशनलाई प्राथमिकता

१३ पुष, काठमाडौं । पार्टी सभापति शेरबहादुर देउवा र उनी निकट गिरोहका कारण नेपाली कांग्रेस इतिहासकै कठिन घडीमा आइपुगेको निष्कर्षसहित कांग्रेस संस्थापन इतर समूहले विशेष महाधिवेशनका लागि थप छलफल अगाडी बढाउने भएको छ । सो समूहका नेता डा. शेखर कोइरालाको सम्पर्क कार्यलय बालुवाटारमा बुधबार बिहान काठमाडौंमा उपलब्ध नेताहरुको बैठकले थप छलफल गर्दै तयारी अवस्थामा रहेने निर्णय गरेको हो ।

छलफलमा कांग्रेसको संसदीय दलको निर्वाचन पछि पार्टीमा विकसित भएका घटनाक्रम र त्यसले पार्टीमा पुर्याएको क्षतिबारे समीक्षा भएको नेता अर्जुननरसिंह केसीले नेपालबहसलाई जानकारी दिए । उनले पार्टी गम्भिर दुर्घटनामा परेको र जनताका बीचमा पनि बदनाम गराउने काम भएको भन्दै अब पार्टीमा नयाँ बहस सिर्जना गरिने बताए । केसीले कांग्रेसलाई यो अवस्थामा पुर्याउने काम नेतृत्वबाट भएको र नेतृत्व वरिपरिको अन्धभक्त गिरोहले पार्टी सभापतिको आँखामा पट्टि बाँधरे धृटराष्टको भुमिकामा राखेकाले यो संकट आइपरेको बताए ।

पार्टी र देशको महत्वपूर्ण विषयमा निर्णय गर्नुपर्दा केन्द्रीय समिति र त्यो नभए कम्तिमा पदाधिकारीसम्मलाई भएपनि बोलाएर छलफल गर्नुपर्नेमा सभापति देउवाले त्यो समेत नगरी आफ्नै हठ्मा सत्ता गठबनधनलाई भत्काउने गरी वरिपरिका अयोग्य र अन्धभक्तहरुको मात्र कुरा सुनेर पार्टीलाई शुन्यमा पुर्याएको निष्कर्ष आफुहरुको रहेको नेता केसीले बताए । अहिलेको नेतृत्व पार्टीमा रहिरहे यसले थप संकट उत्पन्न गराउने भएकाले पार्टीलाई जोगाउनका लागि पनि विशेष महाधिवेश बोलाउनै पर्ने ठहर यो समूहको छ ।

नेता केसीले भने,‘ कांग्रेस भनेर मुख देखाउन नहुने अवस्थामा सभापति जीले पार्टीलाई बदनाम गराउनु भएको छ । अब उहाँबाट पार्टी नेतृत्व सम्भव छैन । देउवाले आफु वरीपरिका भन्दा अरुलाई कांग्रेसका कार्यकर्ता नै होइनन् जसरी व्यवहार गर्नुभयो । सरकार गठन, प्रधानमन्त्री, राष्ट्रपतिबारे के भइरहेको छ । कांग्रेस कसरी अगाडी जाँदा राम्रो हुन्छ भन्ने कुरामा कसैसँग पनि राय लिनुभएन् । उहाँले खराव गिरोहको विश्वास मात्र गर्नुभयो । अब यसरी पार्टी चल्दैन । पार्टीलाई जीवन्त राख्नका लागि केही नयाँ कदम चाल्नैपर्छ । यसका लागि हामी सबै पक्षका साथीहरुसँग निरन्तर छलफल चलाउँदैछौ ।’

केसीले संसदीय दलको नेता र सभापति दुवै पदमा अविश्वासको प्रस्ताव जाने संकेत दिए । पार्टीको केन्द्रिय कार्यसमितिको बैठक बस्नु अगाडी पहिले शेखर समूहका सबै नेताहरुलाई राखेर छलफल गर्ने र देउवा पछि कुनै पक्षविपक्ष नभनी सबै केन्द्रीय समितिका सदस्यहरु र सांसदहरुसँग पनि छलफल गरेर अविश्वासको प्रस्ताव तयार गर्ने केसीको भनाइ छ । बैठकमा पछिल्लो राजनीतिक घटनाक्रम, संसदीय दल निर्वाचनको समीक्षा र आगामी केन्द्रीय समिति बैठकका रणनीतिबारे थप छलफल गर्ने सहमतिपछि आजको छलफल सकिएको उनले बताए ।

संसदीय दलको निर्वाचनमा पार्टी सभापति शेरबहादुर देउवाविरुद्ध कोइराला पक्षबाट कांग्रेस महामन्त्री गगन थापाले प्रतिस्पर्धा गरेका थिए । तर थापा ३९ मत अन्तरले पराजित भए । लगत्तै कांग्रेस नेतृत्वको गठबन्धनबाट माओवादी अलग भएर एमालेसँग मिलेर सरकारको नेतृत्व गरेको छ । गठबन्धन जोगाउन नसकेको भनेर कोइराला, थापा लगायतका नेताहरुले देउवाको आलोचना गर्दै आएका छन् ।

यिनै घटनाक्रमका बीच नेपाली कांग्रेसले केन्द्रीय कार्यसमितिको बैठक बोलाएको छ । बैठक आगामी २२ गते पार्टी कार्यालय सानेपामा बोलाइएको छ । सो बैठकमा उठाउने एजेन्डाबारे कोइराला पक्षले आन्तरिक छलफल सुरु गरेको हो । बैठकमा शेखरसहित गगन थापा, धनराज गुरुङ, जीवन परियार, अर्जुननरसिंह केसी, मिनेन्द्र रिजाल, दिलेन्द्रप्रसाद बडू, चन्द्र भण्डारी, सरिता प्रसाईं, हृदयराम थानी, दीपक गिरीलगायत नेता सहभागी भएका थिए ।