बढी मन्त्रालयको दावी आएपछि सत्ता साझेदार दलहरुको बैठक स्थगित

१२ पुस, काठमाडौं । नेकपा माओवादी अध्यक्ष पुष्पकमल दाहाल ‘प्रचण्ड’ नेतृत्वको सरकार सभहभागि साना दलबाट बढी मन्त्रालयको दावी आएपछि मन्त्रालय बाँडफाँटका लागि बोलाइएको सत्ता साझेदार दलहरुको बैठक स्थगित भएको छ । बैठक तयारी नपुगेको भन्दै स्थगित गरिएको हो ।

प्रधानमन्त्री पुष्पकमल दाहाल प्रचण्डले बुधबार बिहान एमाले अध्यक्ष केपी शर्मा ओली, एकीकृत समाजवादीका अध्यक्ष माधवकुमार नेपाल र जनता समाजवादी पार्टीका अध्यक्ष उपेन्द्र यादवसँग छुट्टाछुट्टै भेट गरेका थिए । ओली र प्रचण्ड बसेर बनाएको खाकाभन्दा विपरित रुपले मन्त्रालय पाउनुपर्ने दावी आएपछि बैठक रोकिएको हो ।

उनीहरुले सरकारमा सहभागि दल र मन्त्रालय अनुसार भागवण्डाको प्रारम्भीक खाका बनाएका थिए । यसैमा छलफल गर्न भनी बैठक बोलाइएको थियो । दावीअनुसार गठबन्धनको सबभन्दा ठूलो दल एमालेले ९ देखि १० वटा मन्त्रालय लिने भने पनि विहानको छलफलमा ओलीले एमालेको दाबी १२ रहनसक्ने बताएका थिए । एमालेले अर्थ मन्त्रालय लिइसकेको छ भने मन्त्रालय नटुंगिएका कारण एमालेबाट मन्त्री भएका तीन जनाले पनि मन्त्रालय पाएका छैनन् ।

यस्तै ७ मन्त्रालय दाबी गरेको माओवादीले ५ वटा पाउने सम्भावना छ । माओवादीका वरिष्ठ उपाध्यक्ष नारायणकाजी श्रेष्ठ उपप्रधान तथा भौतिक पूर्वाधारमन्त्री भइसकेका छन् । रास्वपालाई तीन मन्त्री र एक राज्यमन्त्री दिने तयारी ओली प्रचण्डको छ । रास्वपा सभापति रवि लामिछाने उपप्रधान तथा गृहमन्त्री भइसकेका छन् र रास्वपाको दाबी ५ वटा मन्त्रालयमा छ । एकीकृत समाजवादीलाई २ देखि ३ वटा मन्त्रालय दिएर सरकारमा ल्याउने प्रयास भइरहेको छ । जसपा र जनता समाजवादी पार्टीलाई २–२ वटा मत्रालय दिने गरी खाका बनाइएको थियो ।