गृह मन्त्रालयको विषयलाई लिएर उपप्रधानमन्त्री श्रेष्ठ असन्तुष्ट, प्रचण्डलाई दिएनन् बधाई

१३ पुष, काठमाडौं । सरकारको नेतृत्व गर्ने दलले गृहमन्त्रालय नराखेर अरुलाई दिएको भन्दै उपप्रधानमन्त्री नारायणकाजी श्रेष्ठले असन्तुष्टि जनाएका छन् । उनले सरकारको फर्मेशन गर्ने नेकपा एमालेका अध्यक्ष केपी शर्मा ओली र आफ्नै पार्टीका अध्यक्ष एवं प्रधानमन्त्री पुष्पकमल दाहालसँग यसबारे गम्भिर असन्तुष्टि राखेको बताइएको छ ।

शपथ ग्रहणपछि बसेको पहिलो मन्त्रिपरिषदको बैठकमा उपप्रधान तथा गृहमन्त्री र प्रधानमन्त्री प्रचण्डबीच प्रवक्ताका विषयमा विवाद आएपछि श्रेष्ठ थप असन्तुष्ट बनेको स्रोतको भनाइ छ । सुरुमा गृहमन्त्रालयको तयारीमा बसेका श्रेष्ठलाई अन्तिममा परारष्ट्र हुँदै भौतिक पुर्वाधार मन्त्रालयमा पुर्याइएको थियो । उनी हाल उपप्रधानसहित भौतिक पूर्वाधार तथा यातायातमन्त्री रहेका छन् ।

असन्तुष्ट श्रेष्ठ मन्त्रालय शपथपछि एकपटकभन्दा मन्त्रालयसमेत नगएको बताइएको छ । प्रधानमन्त्री दाहालले पनि उनलाई गृहकै लागि प्रस्ताव गरेका थिए । तर, पछि ओलीले संसद्को चौथो ठूलो दल रास्वपाका सभापति रवि लामिछानेले गृहमन्त्रालय दिन भनेपछि दाहालले लामिछानेलाई नै गृहमन्त्री बनाउन सहमित जनाएका थिए । दाहालको उक्त निर्णयपछि असन्तुष्ट बनेका श्रेष्ठले गृहमन्त्रालय बाहिर दिन गलत भएको बताउँदै आएका छन् ।

श्रेष्ठ निकट एक माओवादी नेताको भनाइमा शितलनिवासमा शपथ लिएर सिंहदरबारस्थित् मन्त्रालयमा पुगेर पदभार ग्रहण गर्दा पनि श्रेष्ठ खुसी थएनन् । उनले मन्त्रालयका कर्मचारीले पहिलो निर्णयको लागि तयार पारेको फाइलमा सुरुका दुई वटा निर्णयमा हस्ताक्षर नै गर्न नमानेको उनको भनाइ छ । पछि तेस्रो बुँदाको निर्णयमा भने उनले हस्ताक्षर गरेका थिए । शपथ खाएकै दिन साँझ मन्त्रालय पुगेका उपप्रधानमन्त्री श्रेष्ठ दुई दिनदेखि मन्त्रालय नै गएका छैनन् । उनी हात्तिवनस्थित् आफ्नै निजी निवासमा बसेका छन् ।

मन्त्री श्रेष्ठले पार्टीका अध्यक्ष तथा प्रधानमन्त्री दाहाललाई अहिलेसम्म उनको निवासमा पुगेर बधाई नदिएको बताइएको छ । मन्त्री श्रेष्ठ दुई दिनदखि मन्त्रालय गएका छैनन् । प्रधानमन्त्री दाहाल भने पदभार ग्रहण गरेको दिनदेखि नियमित प्रधानमन्त्री तथा मन्त्रिपरिषदको कार्यालयमा गएका छन् ।