कुन समूहमा जालान महामन्त्री शर्मा र केन्द्रीय सदस्य पौडेल ?

१४ पुष, काठमाडौं । प्रधानमन्त्रीमा शेरबहादुर देउवाको अडानले राष्ट्रपतिदेखि मुख्यमन्त्रीसम्मका शासकीय पद गुमाउन पुगेको नेपाली कांग्रेसमा यतिबेला कित्ताकाट छलफल माैलाएको छ । संस्थापन समूह र इतरसमूह आगामी केन्द्रीय समितिको बैठकमा राख्ने एजेण्डका विषयमा आ-आफ्ना रणनीतिहरु बनाइरहेका छन् । कोइराला समूहले बुधबार आफु पक्षका सबै तहका नेताहरुलाई भेला गराएर साझा कार्यक्रम बनाएर केन्द्रीय समितिमा लैजाने निर्णय नै गरिसकेको छ ।

संस्थापन समूह पनि कांग्रेसलाई यो अवस्थामा पुर्याउन कारक बनेका पार्टी सभापति देउवाको बचाउका लागि रक्षात्मक रणनीति बनाउँदै इतरसमूहका कमीकमजाेरीको खाेजीमा व्यस्त छ । तर, संसदीय दलको निर्वाचनमा इतरसमूका गगन थापालाई सघाएका महामन्त्री विश्वप्रकाश शर्मा र केन्द्रीय सदस्य प्रदीप पौडेल इतर समूहमा महामन्त्री पौडेलको उपस्थिति कतै पनि देखिएको छैन् । संसदीय दलको निर्वाचन अघिसम्म शर्मा र पौडेल संस्थापन समूहमै थिए ।

महामन्त्री शर्मा पहिले देखिनै सभापति देउवा निकट थिए । तर, १४ औ महाधिवेशनमा उनले क्याम्प परिवर्तन गरेर महामन्त्री जितेका थिए । त्यसपछि गगन थापाको प्रधानमन्त्री बन्ने चाहनामा सहमति जनाउँदै आएका उनले संसदीय दलको चुनावमा थापाका प्रस्तावक बनेका थिए । उनी प्रस्तावक भएपछि यसै समूहमा आएको अनुमान गरिएको थियो । तर, शर्मा अहिलेसम्म खुलेका छैनन् ।

सुरुमा सिटौला समूहमा रहेका केन्द्रीय सदस्य प्रदीप पौडेल पनि १४ औँ महाधिवेशनमा देउवा समूहसँगै मिसिन पुगेका थिए । यसै अनुसार उनले यो पटक प्रतिनिधिसभाको टिकट पनि पाएका थिए । पौडेल पनि संसदीय दलको निर्वाचनमा देउवालाई सघाउन छाडेर इतरसमूहका उम्मेदवार गगन थापालाई सघाउन आइपुगेका थिए । उनको आगमनसँगै कांग्रेसमा युवाशक्ति एकीकृत भएर आएको भन्दै अब पाार्टी पद्धतिमा केही रुपान्तरण आउने अपेक्षा धेरैले गरेका थिए ।

संसदीय दलमा इतरसमूहका उम्मेदवार थापाले आफ्नै समूहको समेत मत नपाएपछि विभ्भिन आशंकाहरु पनि गरिएका हुन् । तर, यस विषयले थप चर्चा पाउने स्थिति आएन । सरकार गठनको विवषय चलिरहेका बेला सत्ता गठबन्धन भाँडिएपछि कांग्रेसमा अर्कै मारामारी सुरु भयो । संसदीय दलमा सघाएका महामन्त्री शर्मा र पौडेल इतर समूहको बुधबारको बैठकमा उपस्थित भएनन् । छलफलका लागि यी दुवै नेतालााई खबर भने गरिएको थियो ।

संसदीय दलको निर्वाचनमा इतरको कित्तामा उभिएसँगै इतरको महत्वपूर्ण निर्णय प्रक्रियामा नेताद्वयको उपस्थिति चासोको विषय बनेको थियो । बैठकमा सबैलाई जानकारी नगरिएकाले पनि उनीहरु नआएको भनिएपनि खबर भने गरिएको एक नेताले बताए । सामान्य छलफल मात्रै भएकाले उनीहरु नआएको बताउँदै कांग्रेस नेता अर्जुननरसिंह केसीले भने,‘अब बस्ने बैठकमा व्यापक छलफल र रणनीति तय हुन्छ । त्यो बैठकमा उहाँहरूको उपस्थिति रहनेछ ।’

पुष २२ गते सभापति देउवाले केन्द्रीय समितिको बैठक बोलाएका छन् । यो बैठकमा दुवै समूहका छुट्टाछुट्टै तयारी भइरहेका छन् ।संस्थापन पक्षका केही नेतासहित इतरसमूहले सभापतिमाथि अविश्वासको प्रस्ताव लाने तयारी गरेको छ भने संस्थापन पक्ष रक्षात्मक रणनीति बनाइरहेको छ । यो अवस्थामा शर्मा र पौडेलको भूमिका कस्तो र कुन समूह लक्षित हुन्छ भन्ने जिज्ञासा कांग्रेस कार्यकर्तामा देखिएको छ ।