न्यूनतम साझा कार्यक्रमबारे प्रधानमन्त्री प्रचण्ड र अध्यक्ष ओलीबीच छलफल

१५ पुस, काठमाडौं । प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीबीच शुक्रबार बिहान भेटवार्ता भएको छ । प्रधानमन्त्री निवास बालुवाटारमा भएको भेटमा सरकारको साझा न्यूनतम कार्यक्रम, मन्त्रिपरिषद विस्तार लगायतका विषयमा छलफल भएको बताइएको छ ।

बिहीबार बसेको सत्ता गठबन्धनको बैठकले एमाले अध्यक्ष ओलीको संयोजकत्वमा उच्चस्तरीय संयन्त्र गठन गरेको थियो । सोही बैठकले पाँच दिनभित्र सरकारको न्यूनतम साझा कार्यक्रम तयार पार्ने निर्णयसमेत गरेको थियो । बिहीबारको बैठकले गठन गरेको संयन्त्रमा सत्ता गठबन्धनका शीर्ष नेताहरू रहेका छन् । संयन्त्रले आवश्यकताअनुसार सरकारलाई मार्गनिर्देशनसमेत गर्न सक्ने एमाले महासचिव शंकर पोखरेलले जानकारी दिएका छन् ।

सत्तारूढ दलले एमाले उपाध्यक्ष एवं उपप्रधान तथा अर्थमन्त्री विष्णु पौडेलको संयोजकत्वमा साझा न्यूनतम कार्यक्रमको मस्यौदा समिति पनि बनाएका छन् । समितिका सदस्यहरूमा माओवादीबाट वर्षमान पुन, राप्रपाबाट धवलशमशेर राणा र राष्ट्रिय स्वतन्त्र पार्टीबाट मुकुल ढकाल सदस्य छन् । जसपाले नाम टुंगो लगाउन बाँकी छ । पाँच दल एमाले, माओवादी, राष्ट्रिय स्वतन्त्र पार्टी, राप्रपा र जसपाबाट मात्रै प्रतिनिधित्व रहे पनि समितिले सरकारलाई समर्थन गरेका अन्य दलको सुझाव लिएर काम गर्ने राप्रपाका अध्यक्ष राजेन्द्र लिङ्देनले बताए । सरकारलाई समर्थन गरेका मध्ये जनमत र नागरिक उन्मुक्ति पार्टीको समितिमा प्रतिनिधित्व छैन । समितिमा नराखेकामा उनीहरूको असन्तुष्टि रहेको स्रोतले जनाएको छ ।

मन्त्रिपरिषद् विस्तार र शक्ति बाँडफाँटका मुद्दा थाती राखेर सरकार साझा न्यूनतम कार्यक्रम बनाउन जुटेको हो । उपप्रधान तथा गृहमन्त्री रवि लामिछानेका अनुसार समितिले पाँच दिनभित्र साझा न्यूनतम कार्यक्रमको मस्यौदा तयार गर्नेछ । कुनै राजनीतिक–वैचारिक आधारबिनै नाटकीय रूपमा विकसित घटनाक्रमबाट माओवादी केन्द्रका अध्यक्ष पुष्पकमल दाहाल नेतृत्वको सरकार गठन भएकाले सत्ता साझेदार दलहरू फरक–फरक वैचारिक, राजनीतिक पृष्ठभूमिका छन् ।

सरकारमा गणतन्त्रवादीदेखि राजतन्त्रको पक्षपातीसम्म, संघीयता पक्षधरदेखि यसको विरोधीसम्म र पुरानादेखि हालैको निर्वाचनमा उदाएका नयाँ दलसम्मको सरकारमा सहभागिता र समर्थन छ । त्यसैले साझा न्यूनतम कार्यक्रममा सबैका एजेन्डा समेट्न गाह्रो हुने देखिएको छ ।