यातायात कार्यालयको अनुगमनपछि मन्त्री श्रेष्ठले भने- हदैसम्म अराजकता रहेछन्

१९ पुष, काठमाडौं । उपप्रधान तथा भौतिक पूर्वाधार तथा यातायात मन्त्री नारायणकाजी श्रेष्ठले मंगलबार काठमाडौं उपत्यकाका यातायात कार्यालयको अनुमगन गरेका छन् ।

सवारी चालक अनुमतिपत्र लिनदेखि विभिन्न सेवा प्राप्त गर्न सेवाग्राहीले सास्ती व्यहोर्नुपरेको र घुस खुवाउँदा मात्र काम हुने गरेको गुनासो आइरहेका बेला उप्रधान तथा यातायात मन्त्री श्रेष्ठले मंगलबार एकान्तकुना, ठूलो भर्याङ र गुर्जुधारा यातायात कार्यालयको अनुगमन गरेका हुन् । सो क्रममा उनले सेवाग्राहीका गुनासो समेत सुनेका थिए ।

गुनासाे सुनेपछि मन्त्री श्रेष्ठले यातायात व्यवस्था सुधार विषयमा सरकारले तत्काल काम थाल्नका लागि प्रदेश सरकारसँग छलफल गरिरहेको जानकारी दिएका थिए ।

सेवाग्राहीले भने मन्त्रीको अनुगमन ‘फेसन’ मात्र भएको र चर्चा बटुल्ने तरिकाले कर्मचारीमा परिवर्तन नआउने प्रतिक्रिया दिएका छन् ।

अनुगमनपछि मन्त्री श्रेष्ठले कार्यालयहरूका सेवा दिने र कर्मचारीको आचरणमा हदैसम्मको अराजकता पाइएको बताए । छिटो सेवा र प्रभावकारी बनाउन कुनै कसर बाँकी नराख्ने उनले बताए । अराजकतालाइ टुलुटुलु हेरेर नबस्ने उनले बताए ।