नेपाल टी–२० लिगमा फिक्सिङको आशंकामा सीआईबीद्वारा अनुसन्धान सुरु

१९ पुष, काठमाडौं । कीर्तिपुरमा जारी नेपाल टी–२० लिगमा फिक्सिङ र बेटिङ हुने गरेको आशंकामा प्रहरीको केन्द्रीय अनुसन्धान ब्यूरो (सीआईबी)ले अनुसन्धान सुरु गरेको छ ।

फिक्सिङ र बेटिङ हुने गरेको भन्दै उजुरी परेपछि सीआईबीले अनुसन्धान सुरु गरेको सीआईबीका एक अधिकारीले बताए । डीएसपीको कमाण्डमा अनुसन्धान अघि बढाइएको स्रोतले बतायो ।

रसियन एप वान एक्स बेटमार्फत् बेटिङ हुने र फिक्सिङ समेत हुने गरेको भन्दै लिग विवादित बनेको छ। नेपाल क्रिकेट संघ क्यानले भारतीय कम्पनी सेभेन थ्री स्पोर्टस्‌लाई लिग आयोजनाको जिम्मा दिएपछि आशंका झनै बढेको छ । नेपालमा अवैधानिक रहेको वान एक्स बेटलाई थ्री स्पोर्ट्स प्रायोजक बनाएको छ ।

फिक्सिङको भइरहेको भन्दै लिग कमेन्टेटर सचिन तिमिल्सेनाले लिग छाडेका छन् । उनले नेपाली क्रिकेटलाई न्याय दिन लिग छाडेको सामाजिक सञ्जाल फेसबुकमा एक भिडियो पोस्ट गर्दै जानकारी गराएका छन् ।

जारी लिगमा म्याच फिक्सिङ नभई स्पट फिक्सिङ हुने गरेको भन्दै खेल जित वा हारमा पुर्याउन गेम चेञ्जरले खेलाडी विशेषलाई कब्जामा राखिने गरिएको उनको भनाइ छ ।

उनले जारी लिगलाई इण्डियन प्रिमियर लिग (आईपीएल)को ‘नेपाली संस्करण’ जस्ताे रहेको गम्भीर आरोप समेत लगाएका छन् ।