नीतिगत समस्या आए म हेर्छु, काम तपाइहरु गर्नूसः प्रधानमन्त्री

१९ पुष, काठमार्डौ । प्रधानमन्त्री पुष्पकमल दाहाल ‘प्रचण्ड’ले जनताको सेवा प्रवाहलाई सुलभ र सरल बनाउदै विकास निर्माणका कामलाई तीव्रता दिन मन्त्रालयका सचिवहरुलाई निर्देशन दिएका छन् । उनले नीतिगत समस्याको हल आफुले गर्ने भन्दै काममा आएको समस्या नीतिगत वा संस्थागत जे भएपनि पहिचान गरेर कार्यान्वयन लान निर्देशन दिएका छन् ।

प्रधानमन्त्री प्रचण्डले परराष्ट्र मन्त्रालयको जानकारी बेगर कुनै पनि विदेशी र कूटनीतिक नियोगका पदाधिकारीहरुसँग भेटघाट नगर्न पनि सरकारी अधिकारीहरुलाई निर्देशन दिएका छन् । दुई दिनसम्म चलेको सचिव बैठकमा मंगलबार निर्देशन दिँदै प्रधानमन्त्री दाहालले परराष्ट्र मन्त्रालयको जानकारीमा मात्र यस्ता भेटघाट गर्ने पाउने बताए ।

उनले भेटघाटसँग सम्बन्धित कूटनीतिक आचारसंहिता समेत बनाउन निर्देशन दिएका छन् । ’नेपालका सरकारी पदाधिकारीहरुले परराष्ट्र मन्त्रालयको जानकारीमा मात्र विदेशी कूटनीतिक भेटघाट गर्ने र परराष्ट्र मन्त्रालयले यस सम्बन्धि आचारसंहिता तयार गर्नुहोला’ प्रधानमन्त्री दाहालले लिखित निर्देशन दिँदै भनेका छन् । उनले मित्रराष्ट्रहरुसँग असंलग्नताको सिद्धान्तमा केन्द्रित रहेर आर्थिक कूटनीति अबलम्बन गर्ने निर्देशन दिएका छन् ।

सरकारले छिमेकी लगायत सबै मित्रराष्ट्रहरुसँग असंलग्नताको सिद्धान्तमा रहेर सन्तुलित र सुमधुर सम्बन्ध राख्न चाहेको भन्दै उनले सबैसँग मित्रताको भावनामा जाने नीति अनुसरण र अवलम्वन गर्दै आर्थिक कूटनीति र अन्तराष्ट्रिय समुदायको सहयोगमा द्विपक्षीय र बहुपक्षीय विकास सहायता परिचालन गर्न निर्देशन दिएका छन् ।

प्रधानमन्त्री प्रचण्डले कार्यलय सममा काम छोडेर अनावश्यक सभा सम्मेलन, गोष्ठी, सेमिनार, प्रशिक्षण दिने, जस्ता कार्यमा नजाने निर्देशन दिएका छन् । सहभागी नभई नहुने मन्त्रालयको प्राथमिकताको कार्यक्रममा मन्त्रालयको सम्वन्धित विषयको एक जनामात्र सहभागी हुने, मन्त्रालयको आधिकारिक धारणा लिएर जाने र फर्केपछि प्रतिवेदन लिने÷दिने व्यवस्था मिलाउन भनेका छन् । प्रचण्डले सचिवहरुलाई कार्यालयको समय पालना र कर्मचारी उपस्थिति, सेवाप्रवाह र सेवाग्राहीप्रतिको ब्यवहार लगायतका कार्यालय संचालन र व्यवस्थापनको अनुगमन र निरीक्षण गर्न पनि निर्देशन दिएका छन् ।