ब्राजिलका महान फुटबलर पेलेको अन्त्यष्टि आज साँझ गरिदै

१९ पुष, काठमाडौं । ब्राजिलका महान फुटबलर पेलेको अन्तिम संस्कार आज नेपाली समय अनुसार साँझ पौने ७ बजे गरिदै छ ।

पूर्व क्लब सान्तोस एफसीको रंगशालामा उनको पार्थिव शरीर राखिएको छ। साओ पाउलोको भिला बेलमिरो स्टेडियममा पेलेलाई हेर्न फ्यानहरु जम्मा भएका छन्।

एडसन एरेन्टेस डो नासिमेन्टो अर्थात् पेलेको बिहीबार क्यान्सरबाट साओपाउलोमा निधन भएको हो। उनी ८२ वर्षका थिए। पेलेले ब्राजिललाई ३ पटक फिफा विश्वकप जिताएका थिए।

उनी समग्रमा ४ पटक विश्वकपमा सहभागी भए। सर्वकालिन महान खेलाडी पेलेको निधनले ब्राजिललाई ठूलो क्षति पुगेको त्यहाँको सररकाले जनाएको छ भने ३ दिन राष्ट्रिय शोकको घोषणा पनि गरेको छ।

पेलेको अन्त्येष्टि मेमोरियल नेक्रोपोल एकुमेनिका, सान्तोस कब्रिस्तानमा गरिनेछ। ८२ बर्षमा निधन भएका पेलेकी १०० वर्षिया आमा पनि छिन्। आमाको निवास नजिकबाट पेलेको शबयात्रा गरिने जनाइएको छ।

पेलेकी आमा ओछ्यानबाट उठ्न सक्दिनन्। पेलेको शवलाई सान्तोसको सडक हुँदै आमाको घर अगाडि लैजाने तयारी गरिएको छ। पेलेको अन्त्येष्टिमा उनको परिवार मात्र सहभागी हुनेछन्।